«Չենք լռելու» երիտասարդական նախաձեռնությունից «Առաջին լրատվական»-ին տեղեկացնում են, որ «Հարավկովկասյան երկաթուղիներ» ՓԲԸ-ն ի պատասխան «Չենք լռելու» երիտաարդական նախաձեռնության օրերս հրապարակած տեսանյութի այսօր հայտնել է, որ Երևանի կենտրոնական երկաթուղային կայարանն ամսվա կենտ օրերին աշխատում է մինչև ժ. 20:30-ը՝ երեկոյան ժամերին չվերթների բացակայության պատճառով:
Ամսվա զույգ օրերին կայարանն աշխատում է մինչ ժ. 23:00-ն, քանի որ ժ. 22:35-ին Երևանից մեկնում է Երևան-Թբիլիսի գնացքը:
«Ըստ ամենայնի, Ռուսական երկաթուղիների դուստր-ձեռնարկությունը մոռացել է, որ կայարաններն ամբողջ աշխարհում տրանզիտային գոտիներ են, որոնցում, օրինակ, գիշերվա ժամը 5-ին ժամանած մարդը կարող է սպասել առավոտյան 8-ի իր գնացքին»,- հայտարարում են նախաձեռնության անդամները՝ ընդգծելով, որ այս միտքը «Հարավկովկասյան երկաթուղիներն» իրենց տարածած պաշտոնական հաղորդագրության մեջ «տհաս» են համարել:
«Նախևառաջ, դեռ պարզ չէ, թե այս պատմության մեջ «տհասն» ով է, երկրորդն էլ, նմանատիպ երևույթներն ապացուցելու են գալիս Հայաստանում ռուսական բիզնեսից որքան հնարավոր է հեռու մնալու վերաբերյալ որոշ քաղաքական և հասարակական գործիչների մտահոգությունների ճշմարտացիությունը»,- հայտատարում է «Չենք լռելուն»։
