Defense News-ի փոխանցմամբ՝ Թուրքիայի կառավարությունը հիմնել է մի հիմնադրամ, որը զբաղվելու է Ստամբուլի նոր տեխնոպարկի՝ Teknopark Istanbul-ի ստեղծմամբ։
Ենթադրվում է, որ դրանում աշխատելու են երկրի խոշորագույն պաշտպանական-արդյունաբերական ընկերությունների ներկայացուցիչները, ինչպես նաև նրանց գիտահետազոտական ստորաբաժանումները։ Այդ ռազմական տեխնոպարկը գտնվելու է Սաբիհա Գյոքչենի (հայկական ծագում ունեցող Թուրքիայի առաջին կին օդաչուի) անվան միջազգային օդանավակայանի հարևանությամբ և ընդգրկելու է 700,000 քառակուսի մետր տարածություն։
Տեխնոպարկի բաժնետոմսերի 45 տոկոսը հատկացվելու է Թուրքիայի պաշտպանական արդյունաբերության քարտուղարությանը, իսկ 40 տոկոսն էլ բաժին է ընկնելու Ստամբուլի առևտրային պալատին։ Նախնական տվյալներով՝ տեխնոպարկում աշխատելու է 30,000 մարդ, իսկ պաշտպանական և՜ քաղաքացիական ընկերությունների տարեկան շրջանառությունը հասնելու է 5 միլիարդ դոլարի։
Ստամբուլի տեխնոպարկն իր աշխատանքները կսկսի 2012 թվականի վերջին։
Հիշեցնենք, որ ներկայումս Թուրքիայում գործում է 37 տեխնոպարկ, որոնց ռեզիդենտներ են հանդիսանում մոտ 1200 ընկերություններ։
