Աֆղանստանի արևելքում այսօր մոտ հազար մարդ է դուրս եկել փողոցներ։ Նրանք բողոքում են ԱՄՆ-ի հետ երկարաժամկետ համագործակցության դեմ, որն ըստ իրենց՝ կհանգեցնի երկրում ամերիկացի զինվորականներից կազմված ջոկատների ավելացմանը: Այս մասին հաղորդում է Reuters-ը:
«Մենք կտրականապես դեմ ենք ամերիկացիների ներկայությանը Աֆղանստանում, նրանք սպանում են մեր հայրենակիցներին՝ իրենց պատահական գործողություններով»,- ասել է ցուցարար Մոհամեդ Տահիրը:
Ցուցարարները, որոնց մեծ մասը ուսանողներ են, պաստառներ են բռնել՝ «Մա՛հ Ամերիկային, մա՛հ Ամերիկայի ստրուկներին» կարգախոսով։ Նրանք վառել են նախագահ Օբամայի խրտվիլակը:
Associated Press-ի հաղորդմամբ՝ ցուցարարները գոռացել են նաև «Մա՛հ Կարզային»` նկատի ունենալով Աֆղանստանի նախագահին:
‹‹Մենք չենք ուզում միշտ Ամերիկայի ստրուկները լինել, մեր համբերությունը սպառվում է: Եթե համաձայնագիրը ստորագրվի մենք փողոցները դուրս կգանք ամեն օր››,- ասել է մեկ ուրիշ ցուցարար:
