Մարտի 1-ի զոհերից Տիգրան Խաչատրյանի մայրը՝ Ալլա Հովհաննիսյանը, «Մարտի 1»-ի գործը քննող քննչական խմբի նոր ղեկավարի՝ Վաղինակ Ջանազյանի հետ առանձնապես մեծ հույսեր չի կապում: Այս մասին նա ասաց «Առաջին լրատվական»-ի հետ զրույցում:
«Նոր եկողի հետ հույսեր չեմ կապում: Նա, ով կոծկում է Մարտի 1-ը, շատ արագ պարգևատրում է ստանում: Բայց մեզ՝ Մարտի 1-ի զոհերի հարազատներին մեկ այլ բան է անհանգստացնում: Ես պատրաստվում եմ մյուս ծնողների հետ քննարկել և ընդհանուր համաձայնության գալու դեպքում բողոք-նամակ հղել եվրոպական կառույցների ներկայացուցիչներին: Երբ ԵԽԽՎ-ն հոկտեմբերին հայտնի՝ Մարտի 1-ի էջը փակելու մասին բանաձևը ներկայացրեց, միաժամանակ ամրագրեց, որ 10 հոգու մահվան համար անհատական պատասխանատվության հարցը լուծելու հնարավորություն չունենալու պարագայում պատճառները պետք է լիարժեքորեն բացատրվեն քննչական մարմնի զեկույցում, և նախաքննական մարմինը պետք է հանրությանը հասանելի վերջնական կամ առնվազն միջանկյալ զեկույց հրապարակի մինչեւ 2011-ի վերջը: Սակայն նորանշանակ Վաղինակ Ջանազյանն էլ երեկ իր հերթին ասաց, որ նոր է ծանոթանում գործին: Զեկույցը, չեմ կարծում, որ կարողանան օբյեկտիվորեն ներկայացնել, ում պետք է այդ զեկույցը ներկայացվի»,- տարակուսանք հայտնեց Ալլա Հովհաննիսյանը:
Նա նշեց, որ բողոք-նամակներ ուղարկելու է Մարդու իրավունքների հանձնակատար Թոմաս Համարբերգին, եվրոպացի այլ պաշտոնյաների: «Չգիտեմ ինչու՝ նա ինձ անկաշառ պաշտոնյա է թվում: Նա ոչ վաղ անցյալում խիստ գնահատականներ էր տվել, նշել էր, որ մարտի 1-ի սպանությունները չբացահայտելը նշանակում է լավ չաշխատել: Ես ասել և հիմա էլ ասում եմ. քաղաքական մյուս հարցերն ինձ չեն հետաքրքրում, բայց սպանությունների մասով պարտադիր պետք է բացահայտում լինի: 3,5-4 տարի է՝ ոչինչ չի արվել, հիմա նոր եկածն ինչ պետք է անի: Ուղղակի նա իշխանություններին պետք է որ պատճառաբանի՝ նոր եմ գործին ծանոթանում: Եթե իշխանությունները դեպքերի բացահայտման իրական ցանկություն ունենային, չպետք է փոխեին Վահագն Հարությունյանին: Նրան ուղղակի վատ աշխատանքի համար պետք է հեռացնեին աշխատանքից, ոչ թե պաշտոնը բարձրացնեին: Գտնում եմ, որ զոհերի հարազատների համար Վաղինակ Ջանազյանի նշանակումը սպանությունների բացահայտման տեսանկյունից հետընթաց է»,- ամփոփեց Ալլա Հովհաննիսյանը:
Նշենք, որ 2008 թվականի մարտի 1-ին և 2-ին Երևան քաղաքում տեղի ունեցած զանգվածային անկարգությունների դեպքի առթիվ հարուցված քրեական գործը քննող քննչական խմբի ղեկավար, ՀՀ հատուկ քննչական ծառայության ՀԿԳ ավագ քննիչ Վահագն Հարությունյանը 2011 թ. նոյեմբերի 16-ին սեփական դիմումի համաձայն ազատվել է զբաղեցրած պաշտոնից և նշանակվել ՀՀ ոստիկանության քննչական գլխավոր վարչության հատկապես կարևորագույն գործերով քննության վարչության պետի պաշտոնում: Քրեական գործի հետագա նախաքննությունը հանձնարարվել է ՀՔԾ ՀԿԳ ավագ քննիչ Վաղինակ Ջանազյանին, որը ղեկավարելու է քննչական խմբի աշխատանքները:
