ԱՄՆ պետքարտուղար Հիլարի Քլինթոնը վերջին 50 տարիների ընթացքում առաջին անգամ այս տարվա դեկտեմբերին պատրաստվում է այցելել Մյանմար: Այս մասին հայտարարել է ԱՄՆ նախագահ Բարաք Օբաման Հարավարևելյան Ասիա կատարած դիվանագիտակյան այցի ժամանակ:
ԱՄՆ նախագահը հայտարարել է, որ Վաշինգտոնը գնահատել է ժողովրդավարական բարեփոխումները Մյանմարում և պատրաստ է «վերաբեռնավորում» սկսել երկկողմ հարաբերություններում:
«Վերջին մի քանի տասնամյակների ընթացքում ամերիկացիները խիստ անհանգստացած էին Մյանմարի բնակիչների հիմնական իրավունքների խախտումներով»,- ԱՄՆ նախագահ Բաարք Օբամայի խոսքերն է մեջբերում The New York Times պարբերականը:- Ժողովրդավարության կողմնակիցների, էթնիկական փոքրամասնությունների հետապնդումները և իշխանության կենտրոնացումը մի քանի զինվորական առաջնորդների ձեռքում… մեկուսացրել են Մյանմարը ԱՄՆ-ից և աշխարհի մեծ մասից»:
Օբամայի խոսքերով` «մթության երկար տարիներից հետո վերջին շաբաթներին մենք առաջընթացի նշաններ ենք տեսել»` կապված երկրում բարեփոխումների հետ:
Օբաման զգուշացրել է, որ երկիրը կշարունակի գտնվել մեկուսացման մեջ, եթե Մյամարը քայլեր չձեռնարկի դեպի ժողովրդավարությունը և չհետևի մարդու իրավունքներին:
Մյանմարը, որ երկար տարիներ գտնվում էր ռազմական խունտայի ղեկավարության տակ, ընտրություններից հետո թևակոխել է ժողովրդավարական բարեփոխումների փուլ: Վերջին 20 տարիների ընթացքում ԱՄՆ-ը և ԵՄ-ը խիստ տնտեսական պատժամիջոցներ էին կիրառում Մյանմարի դեմ:
