«ՀԺ»-ն գրում է. «Ազգային ժողովի քարտուղարությունում հաշվարկել են, որ հնգօրյա ժամկետը, որը լրանալուն պես Աժ նախագահ Հովիկ Աբրահամյանը պետք է կրկին ներկայացնի հրաժարականը կամ հրաժարվի դրանից, լրանում է երկուշաբթի օրը՝ նոյեմբերի 21-ին:
Եթե այդ օրը Աբրահամյանը կրկնի հրաժարականը, այդ պահից իսկ կդադարի Աժ նախագահ լինել, եթե չկրկնի, կշարունակի մնալ Աժ նախագահ:
Իշխանական միջանցքներում լուրեր են շրջում, թե կան ուժեր, որոնք Աբրահամյանին հորդորում են չկրկնել հրաժարականը: Ըստ լուրերի, այդ հայտնի ուժերը հույս ունեն Աժ նախագահի հրաժարականից հրաժարվելու առիթն օգտագործելով՝ փոխել հարաբերակցությունը գործող Աժ-ում և ՀՀԿ-ի բազայի վրա ստեղծել նոր խմբակցություն, որը ԲՀԿ-ի հետ նոր մեծամասնություն փորձի ձևավորել: Հովիկ Աբրահամյանը, սակայն, մեծ հավանականությամբ կկրկնի հրաժարականը, քանի որ գիտի՝ խոցելի է իշխանության առաջ, իսկ դիտորդները կարծում են, որ երբ նա այլևս դե յուրե չլինի Ազգային ժողովի նախագահ, Սերժ Սարգսյանը իսկական գրոհ է ձեռնարկելու «Բարգավաճ Հայաստան»-ի վրա:
Համենայնդեպս’ ՀՀԿ-ին մոտ կանգնած անձինք պնդում են, որ Սերժ Սարգսյանն ամենևին էլ վճռականության պակասից չէ կասեցրել պաշտոնանկությունների գործընթացը, այլ ամեն ինչ երաշխավորված, անցնցում անելու մտահոգությունից դրդված:
Ըստ այդմ, եթե Հովիկ Աբրահամյանի Աժ նախագահ լինելու պայմաններում ԲՀԿ-ի դեմ գրոհ սկսվեր, Հովիկ Աբրահամյանը կարող էր կասեցնել այդ գործընթացը՝ Աժ¬ում ուժերի հարաբերակցությունը փոխելու սպառնալիքի ներքո: Ի վերջո, Ծառուկյանն ու Աբրահամյանը խնամիներ են և թոռնիկների մասին մտածելու ընդհանրությամբ են կապված:
Ճիշտ են այս մտահանգումները, թե ոչ, կերևա երկուշաբթիից հետո ՀՀԿ-ոմ սակայն, քիչ չեն մարդիկ ովքեր կարծում են, որ Սերժ Սարգսյանը կիսաքայլերից ավել անել չի կարողանալու, որովհետև վերջնականորեն կորցրել է վստահությունը սեփական ուժերի նկատմամբ: Վերլուծաբանների գնահատականները, այսուհանդերձ միանշանակ են. այսօրվա վիճակի բնականոն զարգացումը անսպասելիորեն հանգեցնելու է Սերժ Սարգսյանի կրախի»,- ապա թերթը հավելում է.
«Վերջինիս թիմը հասկանում է բեկում արձանագրելու անհրաժեշտությունը, բայց կասկածում է դա անելու` առաջնորդի ունակությանը: Հիմա մի իրավիճակ է, որ բոլոր այն հանրապետականները, ովքեր բարի հարաբերություններ ունեն քոչարյանածառուկյանական թևի հետ, աշխատում են առնվազն պահպանել դրանք: Համենայնդեպս: Պակաս շփոթված ու անհանգիստ չեն ԲՀԿ-ականները: Նրանք ամենալավը գիտեն, որ իրենց առաջնորդը ինքնուրույն քաղաքական ֆակտոր չէ և նրա թիկունքին թելեր կան: Արդյոք թելավորները վճռական պահին կկարողանա՞ն պաշտպանել իրենց, ամենևին էլ վստահ չեն: ԲՀԿ-ում կարծում են. որ իրենց առաջնորդի գլխին մի ուրվական է պտտվում՝ Գասպարյան Վովայի ուրվականը:
