«Հանրապետություն» կուսակցության ղեկավար, Հայ ազգային կոնգրեսի ներկայացուցիչ Արամ Սարգսյանը դրական է գնահատում ԵՄ արտաքին գործերի և անվտանգության քաղաքականության հարցերով բարձր ներկայացուցիչ Քեթրին Էշթոնի այցը Հայաստան, քանի որ համոզված է, որ Արևմուտքի՝ Հայաստանին առաջարկած ուղղությունը ճշգրիտ ուղղություն է: Նման տեսակետ նա հայտնեց «Առաջին լրատվական»-ի հետ զրույցում:
«Այդ ուղղությունը փորձարկված ուղղություն է, և ժողովրդավար երկրներին առաջընթաց ու բարեկեցություն ապահովող այլ քաղաքական տարբերակ դեռ ստեղծված չէ: Շատ լավ է, որ եվրոպական կառույցները հետաքրքրված են Հայաստանով»,- նկատեց Արամ Սարգսյանը:
ՀԱԿ ներկայացուցիչը հատկանշական համարեց նաև, որ Էշթոնը ԵԱՀԿ-ի՝ ԼՂ հակամարտության լուծմանն ուղղված ջանքերին աջակցելու միտք է հայտնել: «Միանշանակ գտնում եմ, որ ԵԱՀԿ Մինսկի խմբի ձևաչափը չպետք է փոփոխվի: Եթե նույնիսկ դրա եռանախագահողներից մեկն է փոխվում, որոշակի դժվարություններ են առաջանում: Այդ է պատճառը, որ ղարաբաղյան հակամարտությունը պետք է լուծվի Մինսկի խմբի բանակցային ճանապարհով, այլապես ձևաչափի փոփոխությունը վնասելու է թե՛ Հայաստանին, թե՛ ԼՂ կարգավորման գործընթացին ընդհանրապես: Որքան շատ միջազգային կառույցների ներկայացուցիչներ ԵԱՀԿ Մինսկի խմբի գործունեությանը սատարելու միտք արտահայտեն, այնքան ավելի լավ»,- ամփոփեց Արամ Սարգսյանը:
Հիշեցնենք, որ տարածաշրջանային այցի շրջանակներում Քեթրին Էշթոնը Հայաստան է ժամանել այսօր՝ նոյեմբերի 17-ին: ՀՀ ԱԳ նախարար Էդվարդ Նալբանդյանի հետ հանդիպման ժամանակ նա նշել է, որ Եվրամիությունը կարևորում է Հայաստանի հետ համակողմանի համագործակցության զարգացումը և շարունակելու է իր աջակցությունը մեր երկրի զարգացմանն ու բարեփոխումների իրագործմանը: Զրուցակիցները արձանագրել են, որ վերջին շրջանում հարաբերությունները դինամիկ զարգացում են ապրել, որն արտահայտվում է թե՛ բարձր մակարդակի շփումներով, թե՛ քաղաքական երկխոսության օրակարգի ընդլայնմամբ և խորացմամբ, թե՛ ասոցացման համաձայնագրի բանակցություններում շարունակական առաջընթացով:
Քեթրին Էշթոնն իր աջակցությունն է հայտնել ԼՂ հակամարտության լուծման ուղղությամբ ԵԱՀԿ Մինսկի խմբի համանախագահների կողմից ձեռնարկվող ջանքերին:
