«Հայկական ժամանակն» իր այսօրվա «Ռուսական ֆորպոստ, պարսկական աշտարակ» խորագրով հոդվածում գրել է, որ «շատ մեծ է հավանականությունը, որ շուտով Երևանի սրտում` «Մոսկվա» կինոթատրոնի և «Գոլդեն թուլիփ» հյուրանոցի հարևանությամբ, սկսվի մի հսկայական շինարարություն, որի արդյունքում այդտեղ վեր կխոյանա Երևանի ամենաբարձր` 50 հարկանի մի շինություն»:
Ըստ օրաթերթի` քննարկումներ են գնում արդեն Երևանի քաղաքապետարանի համապատասխան ստորաբաժանումներում և նախագծային ինստիտուտներում, անշուշտ՝ «հույժ գաղտնի պայմաններում»:
Այս առնչությամբ «Առաջին լրատվական»-ը Հայաստանի ճարտարապետների միության նախագահ Մկրտիչ Մինասյանից փորձեց պարզաբանում ստանալ` ի՞նչ նախագծի մասին է խոսքը: Վերջինս մեզ հետ զրույցում ասաց, որ իհարկե, քաջատեղյակ է կինոթատրոնի ու հյուրանոցի միջև գտնվող` պարսկական կողմին վաճառված այդ հողատարածքից: Խնդիրը նոր չէ, սակայն հարցը, թե ինչու է հիմա դարձյալ այդ նախագիծը շրջանառվում, իր համար անհասկանալի է:
«Այս հարցը մի քանի տարի առաջ Քաղաքաշինական խորհուրդը քննարկել է: Դա վաղեմություն ունեցող հարց է: Այդ հողակտորը պարսիկները գնել էին: Դա նրանց սեփականությունն է, և անընդհատ ուզում են այդտեղ աշտարակ կառուցել»,- հայտնեց Մ. Մինասյանը` ընդգծելով, որ կառույցի շինարարությունն անթույլատրելի է:
Նրա խոսքով, աշտարակի այն կոնցեպցիան, որը ներկայացվել է Քաղաքաշինական խորհուրդ, մերժվել է: «Հիմա իրանական կողմը շրջանառության մեջ է դրել, բայց ինձ թվում է` իզուր»,- նշեց նա:
Հարցին` որքանո՞վ է հավանական հյուրանոցի կառուցումը, նա պատասխանեց, որ չի կարելի ոչ մի գնով թույլատրել բարձրահարկի կառուցումը, որը կդառնա «Մոսկվա» կինոթատրոնի երկրորդ խնդիրը:
