Google ընկերությունը Լոս Անջելեսում նոյեմբերի 16-ին ներկայացրել է իր Google Music երաժշտական խանութը, որտեղ օգտատերերը հնարավորություն ունեն երգեր գնել Android Market հավելվածի օգնությամբ:
Ինչպես գրում է Engadget բլոգը, Google-ի ներկայացուցիչները հայտնել են, որ համաձայնություն են կնքել հազարավոր երաժշտական կազմակերպությունների, այդ թվում՝ EMI Music և Sony Music ընկերությունների հետ` մուտքի իրավունք ստանալով դեպի 13 միլիոն երաժշտական համար:
Bloomberg գործակալությունը գրում է, որ օգտատերերը, նախքան երգը ձեռք բերելը, հնարավորություն ունեն 90 վայրկյան լսելու ցանկացած երաժշտության «սկզբի մասը»:
Գործակալությունը նշում է, որ Google-ը ակտիվ գործունեություն է ծավալելու երաժշտական և կինոբիզնեսի, ինչպես նաև հեռուստատեսության բնագավառում` իր Android պլատֆորմն առաջ տանելու համար:
Google-ի երաժշտական ծառայության փորձնական տարբերակը թողարկվել է 2011 թվականի մայիսին: Օգտատերերը հնարավորություն են ստացել ներբեռնելու ավելի քան 20 հազար երգ Google-ի սեփական ցուցակից:
Նախնական տարբերակում ծառայությունը հասանելի էր Android հարթակի համար, սակայն սեպտեմբերին այն հասանելի դարձավ նաև iPhone-ի և iPad-ի համար:
