Կառավարությունը նախատեսում է վաղը հավանություն տալ «Զինապարտության մասին» ՀՀ օրենքում փոփոխություն և լրացում կատարելու մասին» ՀՀ օրենքի նախագծի վերաբերյալ կառավարության եզրակացության նախագծին և այն սահմանված կարգով ներկայացնել Ազգային ժողով:
Օրենքի նախագծով երկքաղաքացու կարգավիճակ ունեցող ՀՀ քաղաքացիների զինապարտության խնդրի կարգավորման վերաբերյալ առաջարկվող լուծումներն ընդհանուր առմամբ ապահովում են պարտադիր զինվորական կամ այլընտրանքային ծառայության կրկնակի զորակոչի բացառումը: Սակայն երկքաղաքացու կողմից զինվորական ծառայություն անցնելու երկրի ընտրության իրավունքը չի համապատասխանում միջազգայնորեն ընդունված պրակտիկային, քանի որ երկքաղաքացին, որպես կանոն, զինվորական ծառայությունն անցնում է այն պետության տարածքում, որտեղ մշտապես բնակվում է և զինվորական ծառայություն անցնելու երկրի ընտրություն կատարելու իրավունք ունի միայն այն դեպքում, երբ գտնվում է երրորդ պետության տարածքում, որի քաղաքացին չի հանդիսանում:
Կառավարությունն առաջարկում է ՀՀ քաղաքացիություն ընդունած այլ պետության քաղաքացուն ազատել պարտադիր զինվորական կամ այլընտրանքային ծառայությունից, եթե այլ պետությունում անցել է պարտադիր զինվորական կամ այլընտրանքային ծառայություն:
