Թուրքական Anadolu գործակալության փոխանցմամբ՝ Իրանը «միջուկային» առաջարկ է արել Թուրքիային՝ պատրաստակամություն հայտնելով Թուրքիայի հետ կիսել միջուկային տեխնոլոգիաների ոլորտում ունեցած իր փորձը։
Իրանի Մարդու իրավունքների բարձրագույն խորհրդի և ֆիզիկայի ու մաթեմատիկայի իրանական ինստիտուտի ղեկավար Մոհամադ Ջավադ Լարիջանին Նյու Յորքում լրագրողներին հայտարարել է, որ իր երկիրը ցանկանում է օգնել Թուրքիային ատոմակայաններ կառուցելու հարցում.
«Թուրքիան երկար տարիներ ձգտում է ատոմակայաններ կառուցել։ Ցայժմ ոչ մի արևմտյան երկիր պատրաստակամություն չի հայտնել Թուրքիայում ատոմակայան կառուցելու հարցում»։
Լարիջանին ընդգծել է, որ Իրանն այդ հարցում պատրաստ է համագործակցել նաև Մերձավոր Արևելքի մյուս երկրների հետ։
Հիշեցնենք, որ ներկայումս Թուրքիան ցանկանում է կառուցել 3 ատոմակայան. միջերկրածովյան Մերսին նահանգի Աքքույու վայրում, սևծովյան Սինոպում և Թրակիայում (Թուրքիայի եվրոպական հատված) գտնվող Իղնեադա վայրում։