Սիրիան հրաժարվել է մասնակցել Արաբական երկրների լիգայի (ԱԵԼ) արտգործնախարարների արտահերթ նիստին, որի նպատակն է քննարկել Սիրիայում տիրող իրավիճակը: Այս մասին հաղորդում է Reuters գործակալությունը՝ վկայակոչելով Սիրիայի պետական լրատվական գործակալությանը:
Հանդիպումը նախատեսվում է չորեքշաբթի Մարոկկոյի մայրաքաղաք Ռաբաթում:
Լիգայի արտահերթ գագաթնաժողովը կազմակերպվել է Սիրիայի իշխանությունների խնդրանքով այն բանից հետո, երբ անցյալ շաբաթ ԱԵԼ-ը կասեցրեց Սիրիայի անդամակցությունը կազմակերպությանը և սպառնաց երկրի իշխանություններին քաղաքական և տնտեսական պատժամիջոցներով:
ԱԵԼ-ի երկրները և ՄԱԿ-ը ուժեղ ճնշումներ են գործադրում Սիրիայի իշխանությունների վրա, որը հրաժարվում է բանակցություններ սկսել ընդդիմության հետ: ՄԱԿ-ի տվյալներով՝ 2011 թ. մարտից մինչ այժմ Սիրիայի կառավարական ուժերի և ընդդիմության միջև տեղի ունեցած բախումներում զոհվել է ավելի քան 2500 մարդ:
