Թուրքական Haber Türk թերթի փոխանցմամբ՝ թանկացել է «Բաքու-Թբիլիսի-Կարս» (ԲԹԿ) երկաթգծի թուրքական հատվածի կառուցման նախագիծը։ Դրա պատճառն այն է, որ ԲԹԿ-ի՝ 74 կիլոմետրանոց թուրքական հատվածի կառուցման համար նախատեսված 290 միլիոն թուրքական լիրան (1 դոլարը հավասար է 1.77 թուրքական լիրայի) սպառվել է, մինչդեռ կառուցումը չի ավարտվել։
Այժմ անհրաժեշտ է հավելյալ 700-750 միլիոն լիրա գումար՝ ԲԹԿ-ի թուրքական հատվածի կառուցումն իր ավարտին հասցնելու համար, ինչի պատճառով տենդեր է հայտարարվելու։
Հիշեցնենք, որ 2007 թվականի փետրվարի 7-ին Վրաստանի մայրաքաղաքում Հայաստանի չորս հարևաններից երեքը՝ Վրաստանը, Ադրբեջանը և Թուրքիան, ստորագրեցին «Թբիլիսյան հռչակագիրը»՝ միմյանց միջև հաղորդակցային և էներգետիկ համագործակցության խորացման մասին:
Երկաթգծի թողունակությունը մոտ հեռանկարում կազմելու է տարեկան 25-30 միլիոն տոննա բեռնափոխադրություն («Գյումրի-Կարս» երկաթգծի դեպքում այդ ցուցանիշը կազմում էր 10 միլիոն տոննա), իսկ ներկայումս՝ 17 միլիոն տոննա։
2007 թվականին Ադրբեջանը համաձայնել էր Վրաստանին տրամադրել 200 միլիոն դոլարի վարկ ԲԹԿ-ի վրացական հատվածի կառուցման համար։ Այն ժամանակ ԲԹԿ-ի նախագիծը գնահատվում էր 600 միլիոն դոլար։
Սակայն երբ վերջին շրջանում հայտնի դարձավ, որ ԲԹԿ-ի նախագիծը կրկնակի թանկացել է՝ հասնելով 1.2 միլիարդ դոլարի, և Ադրբեջանը ստիպված եղավ հավելյալ 575 միլիոն դոլարի վարկ տրամադրել Վրաստանին՝ վարկի ընդհանուր գումարը հասցնելով 775 միլիոն դոլարի։
