Քիչ առաջ ՀՀ ԱԺ նախագահ Հովիկ Աբրահամյանը րոպեներ առաջ ընթերցել է իր հրաժարականի դիմումը:
Վերջինիս հեռանալու մասին հայտնի էր դարձել դեռևս 10 օր առաջ:
Հ. Աբրահամյանը գլխավորելու է Հանրապետական կուսակցության նախընտրական շտաբը 2012թ. խորհրդարանական ընտրություններին ընդառաջ:
«Արդեն գիտեք, որ գալիք ընտրություններում ես գլխավորելու եմ Հանրապետական կուսակցության շտաբը և արդեն իսկ հայտարարել եմ, որ այդ կարևոր գործին նախապատրաստվելու համար որոշել եմ վաղաժամ վայր դնել ԱԺ նախագահի իմ լիազորությունները»,- ներկայացնելով հրաժարականը`հայտնել է Հ. Աբրահամյանը:
Հիշեցնելով, որ 2008թ. սեպտեմբերի 29-ին ընտրվելով ՀՀ ԱԺ նախագահի պաշտոնում` վերջինս հայտարարել է, որ ԱԺ-ի գործունեությունը պետք է լինի թափանցիկ, իսկ ԱԺ-ն` հասանելի հասարակության համար, նա ասել է, որ թող անհամեստ չհնչի, բայց իրեն հաջողվել է ապահովել խորհրդարանի հնարավորինս թափանցիկ գործունեությունը և կարողացել է սերտացնել խորհրդարան-հասարակություն կապը:
Աբրահամյանը շնորհակալություն է հայտնել ԱԺ պատգամավորներին համատեղ աշխատանքի, ինչպես նաև քննադատությունների համար` նկատի ունենալով ԱԺ «Ժառանգություն» խմբակցության պատգամավոր Ստեփան Սաֆարյանին:
Վերջինս, ելույթ ունենալով Աբրահամյանի` դահլիճը լքելուց հետո, հիշեցրել է, որ երեք տարի առաջ «Ժառանգությունը»` որպես ժողովրդարանական ընդդիմություն, չսատարեց Աբրահամյանի թեկնածությունը և որ անցած ժամանակաշրջանում իր կուսակցության և Աբրահամյանի հարաբերությունները միշտ չէ, որ հարթ են եղել:
Սաֆարյանը ևս շնորհակալություն է հայտնել ԱԺ նախագահին համատեղ աշխատանքի համար:
Հ. Աբրահամյանը հայտարարել է, որ չի պատրաստվում հրաժարվել իր պատգամավորական պարտականություններից: