Այսօր աշխարհում նշվում է որակի միջազգային օրը: Ինչպես լրագրողների հետ հանդիպմանը նշեց Սպառողների ազգային ասոցիացիա ՀԿ նախագահ Արմեն Պողոսյանը, կարևոր է, թե որքանով են որակի ցուցանիշները համադրելի: Օրինակ՝ Հայաստանում կաթնամթերքի վրա գրված են նաև անգլիական չափման միավորներ` oz, որը մեր սպառողին անծանոթ է:
Սննդամթերքի օրենքում մի մեծ գլուխ հատկացված է մակնշմանը. 9 ցուցանիշներ պետք է լինեն` արտադրության տարեթիվը, պիտանելիության ժամկետը, արտադրողը, բաղադրությունը և այլն, սակայն ոչ միշտ է մակնշումը ամբողջությամբ արվում:
ՀԿ ներկայացուցիչները այցելել են 47 խանութ, և մոտ կեսը` 17, տուգանվել են ժամկետանց ապրանքների վաճառքի համար. «Այս թվերը խոսում են այն մասին, որ վիճակը բավականին լուրջ է: Ընդ որում՝ դեռ չենք տուգանել արտասահմանյան լեզվով գրված մակնշումների համար»:
Գյուղնախարարության Սննդամթերքի անվտանգության պետական ծառայության պետի մամլո քարտուղար Բաբկեն Պիպոյանի խոսքով՝ արտադրությունը և վերջնաժամկետը նշելը պարտադիր է, կարող է լինել նաև արտադրության ժամկետը և պահպանության տևողությունը: Ըստ Բ. Պիպոյանի՝ խնդիրը պետք է հիմնովին լուծել, այլապես մի խանութում լուծելու դեպքում, մնացածը կմնան չլուծված, և մարդիկ իրենք պետք է նախաձեռնող լինեն իրենց իրավունքների պաշտպանության համար, մարդիկ իրենք պետք է հասկանան, որ չի կարելի գնել չստուգված միս կամ այլ մթերք:
«2-8 աստիճանում սառնարանում պահպանված միսը ավելի անվտանգ է, քան առավոտյան ոչ սառնարանում պահված միսը: Միացված սառնարանի պայմաններում, երբ էլեկտրաէներգիան արդեն ծախսում են, միևնույն է՝ սառնարանում չեն պահպանում միսը»,- ասաց Բ. Պիպոյանը` հավելելով, որ պետք է մակնշման վրա նշված պահպանման ջերմաստիճանին ուշադրություն դարձնել, իսկ բժշկի տված տեղեկանքը տվյալ պահի համար է, ու եթե միսը ոչ պատշաճ վիճակում է տեղափոխվում շուկա, ապա բազմապիսի վարակներ ու մանրէներ են զարգանում:
