ԵՄ արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնի մամուլի ծառայությունը հայտնել է, որ Էշթոնը շաբաթ օրը ժամանելու է Տրիպոլի, որտեղ պաշտոնապես բացելու է Լիբիայում ԵՄ դիվանագիտական ներկայացուցչությունը:
«Տրիպոլիում ԵՄ լիիրավ ներկայացուցչության բացումը ընդգծում է ԵՄ սերտ կապերի հաստատումը լիբիացի ժողովրդի հետ»,- հայտարարել է Էշթոնը:
Ինչպես հայտնում է РИА Новости-ն, Լիբիայում Էշթոնը բանակցություններ կվարի Լիբիայի Ազգային անցումային խորհրդի ղեկավար Մուստաֆա Աբդուլջալիլի հետ, վարչապետ Աբդուռահման Ալ-Քեյբի և ՄԱԿ-ի առաքելության ղեկավար Յան Մարտինի հետ:
Էշթոնը նաև ելույթով հանդես կգա լիբիացի կանանց իրավունքները պաշտպանող ֆորումի մասնակիցների համար:
Հիշեցնենք, որ մայիսի վերջին Էշթոնը Բենգազիում բացել էր ԵՄ գրասենյակ, որն այդ պահին դարձել էր լիբիական ընդդիմության «շտաբ-բնակարան»: Օգոստոսի 31-ին, երբ ընդդիմությունը վերահսկողություն սահմանեց Տրիպոլիի վրա, ԵՄ արտաքին հարաբերությունների և անվտանգության քաղաքականության հարցերով գերագույն հանձնակատարն այնտեղ ուղարկեց առաջատար դիվանագետների խումբ` Լիբիայում ԵՄ ներկայացուցչության բացման աշխատանքները նախապատրաստելու համար:
Լիբիայում զինված հակամարտության սկզբից ԵՄ-ը հատկացրել էր 150 միլիոն եվրոյի չափով հումանիտար օգնություն: Եվրահանձնաժողովը իր հերթին հայտարարել էր 30 միլիոն եվրո տրամադրելու մասին: Եվս 50 միլիոն եվրո կտրամադրվի Լիբիային` որպես վաղաժամկետ աջակցություն: Հիշեցնենք նաև, որ զինված ապստամբությունը Լիբիայում շարունակվում էր մոտ ինը ամիս: Այս ընթացքում մահացել է մոտ հազար մարդ, մեծ վնասներ է հասցվել երկրի տնտեսությանը: Մումամար Քադաֆին, որը երկիրը կառավարում էր 42 տարի, սպանվել է հոկտեմբերի 20-ին Սիրթ քաղաքում:
