Ռուսական Regnum լրատվական գործակալությունը, վկայակոչելով թուրքական Sabah թերթին, հայտնում է, որ Heron տիպի իսրայեալական արտադրության անօդաչու թռչող սարքը (ԱԹՍ) ընկել է Թուրքիայի տարածքում՝ Ադանա քաղաքի մոտ ընկած Միջերկրական ծովի ջրերում։
Նշվում է, որ կործանված ԱԹՍ-ն հայտնվել է տեղի ձկնորսների ցանցում, ինչից հետո ուղարկվել է Անկարա՝ համապատասխան վերլուծության ենթարկվելու համար։
ԱԹՍ-ի կործանման վայրում ձկնորսները հայտնաբերել են լուսա և տեսա սարքավորում, որով հագեցած է եղել իսրայելական ԱԹՍ-ն։ Թուրքական թերթը կարծում է, որ այդ ԱԹՍ-ն զբաղված է եղել լուսանկարներ անելով և նկարահանումներ իրականացնելով։
Ադանայի նահանգապետ Մուսթաֆա Քըլըչը հրաժարվել է մեկնաբանել տեղի ունեցածը՝միայն հայտնելով, որ հստակ տեղեկատվություն չունի այդ կապակցությամբ։ Մի շարք ռազմական փորձագետներ չեն բացառում, որ այդ ԱԹՍ-ն վայր է գցել «Քրդստանի աշխատավորական» կուսակցությունը (PKK):
Թուրքիան իսրայելական արտադրության Heron տիպի ԱԹՍ-ները գործածում է հետախուզության, տեղանքի նկարահանման, քուրդ զինյալների դիրքերին ճշգրիտ ռմբակոծություններ ու հրթիռային հարվածներ հասցնելու, ինչպես նաև հեռավոր շրջաններում ընկած զորամասերին զենք ու զինամթերք հասցնելու համար։
Նշվում է, որ Թուրքիան 10 Heron-ի համար Իսրայելին վճարել է 190 միլիոն դոլար։
Հիշեցնենք, որ օրեր առաջ հաջող փորձարկում էր անցել ANCA տիպի թուրքական արտադրության առաջին ԱԹՍ-ն։