Грузия Online-ի փոխանցմամբ՝ Բաթումում տեղի ունեցած՝ Վրաստանի նախագահ Միխեիլ Սաակաշվիլիի ու ՆԱՏՕ-ի գլխավոր քարտուղար Անդերս Ֆոգ Ռասմուսենի համատեղ մամլո ասուլիսի ժամանակ Ռասմուսենը չի բացառել, որ ՆԱՏՕ-ին Վրաստանի անդամակցության հարցը կարող է դիտարկվել 2012 թվականի մայիսին Չիկագոյում կայանալիք ՆԱՏՕ-ի համաժողովում։
Ռասմուսենի խոսքերով՝ մինչ այդ կա կես տարի ժամանակ, և այդ ընթացքում Վրաստանը հնարավորություն է ստանում է՛լ ավելի մոտենալու ՆԱՏՕ-ին անդամակցությանը։ Հերթական անգամ ընդգծելով, որ Վրաստանն անդամակցելու է ՆԱՏՕ-ին՝ Ռասմուսենը նշել է, որ դրա համար Վրաստանը դեռ անելիքներ ունի, ինչը մասնավորապես վերաբերում է անհրաժեշտ ժողովրդավարական բարեփոխումների իրականացմանը.
«Վրաստանը պետք է նաև առաջընթաց գրանցի երկրի պաշտպանական ոլորտում։ Վրաստանը պետք է նաև շարունակի իր դատական բարեփոխումները և լուրջ աշխատանքներ տանի Ընտրական օրենսգրքի ու օրենքի գերակայության բարելավման ուղղությամբ»։
Ռասմուսենը հավելել է, որ հաջորդ տարի Վրաստանն ավելի շատ ներկայացուցիչներ է ունենալու Աֆղանստանում, և Սաակաշվիլիին հրավիրել է մասնակցել առաջիկայում Բրյուսելում կայանալիք ՆԱՏՕ-ի նիստին։
Հիշեցնենք, որ Ռասմուսենն արդեն իսկ լքել է Վրաստանը։
