Ռուսական Regnum լրատվական գործակալության փոխանցմամբ՝ ԵԱՀԿ Մինսկի խմբի համանախագահները նոյեմբերի վերջին հերթական անգամ կայցելեն տարածաշրջան։ Այս մասին այսօր տեղի ունեցած ճեպազրույցի ժամանակ հայտարարել է Ռուսաստանի ԱԳՆ-ի պաշտոնական ներկայացուցիչ Ալեքսանդր Լուկաշևիչը։
Վերջինիս խոսքերով՝ միջնորդները շարունակելու են ջանքեր գործադրել ղարաբաղյան հակամարտության կարգավորման ուղղությամբ։
Հիշեցնենք, որ ԵԱՀԿ Մինսկի խմբի համանախագահներ Բեռնար Ֆասիեն (Ֆրանսիա), Ռոբերտ Բրադկեն (ԱՄՆ) ու Իգոր Պոպովը (Ռուսաստան) վերջին անգամ տարածաշրջան են այցելել հոկտեմբերի վերջին։
Նոյեմբերի 3-ին նրանք Վիեննայում ներկայացրին իրենց տարեկան գործունեության զեկույցը, որի մեջ նշված է, որ նրանք այս տարի 8 անգամ այցելել են տարածաշրջան, 14 անգամ տարբեր երկրներում հանդիպել են Հայաստանի և Ադրբեջանի նախագահների հետ և վերջին 4 ամիսների ընթացքում 4 անգամ հատել են հայ-ադրբեջանական շփման գիծը։