Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին լեհական EurActiv բյուրոյին տված հարցազրույցի ժամանակ անդրադարձել է ռուս-վրացական հարաբերությունների խնդրին.
«Ես անհանգստացած եմ, որ Ռուսաստանում ղեկավարության փոփոխությունից հետո ռուս-վրացական հարաբերությունները ոչ միայն չեն բարելավվի, այլև կվատթարանան։ Վլադիմիր Պուտինը բաց հայտարարել է, որ ցանկանում է վերականգնել Խորհրդային միությունը։ Նա ոչ միայն բարձրաձայնում է այդ մասին, այլև կոնկրետ քայլեր է ձեռնարկում տվյալ ուղղությամբ։
Նա նաև հայտարարել է Հարավային Օսիայի ու Բելառուսի միավորման հնարավորության մասին։ Պուտինը մշտապես այդ ամենի մասին հայտնում է բացարձակապես բոլորին։ Նա ասում է այն, ինչ մտածում է։ Ռուսաստանի հարևանները գտնվում են բարդ վիճակում, քանի որ ճնշում են զգում Ռուսաստանի կողմից։
Այնուամենայնիվ, ես կարծում եմ, որ Ռուսաստանի նմանատիպ քաղաքականությունը մշտապես չի շարունակվելու։ Ռուսաստանը բավականաչափ ռեսուրսներ չունի, այդ թվում՝ նաև ինտելեկտուալ առումով, որպեսզի շարունակի այդ քաղաքականությունը։
Վրաստանը սպասում է այն պահին, թե երբ ռուս ժողովուրդը կգիտակցի այդ քաղաքականության հետագա շարունակման անհնարինությունը և կակտիվացնի իր ջանքերն այն ժամանակ, երբ երկրում տեղի կունենա ռուսական ղեկավարության փոփոխություն։
Վրաստանն էլ ժամանակի ընթացքում որքան մոտենա եվրոպական ինստիտուտներին, այնքան կփոխվի Ռուսաստանի քաղաքականությունը նրա հանդեպ։ Վերջապես Ռուսաստանն էլ կցանկանա պատկանել Եվրոպային։ Մի գեղեցիկ օր Ռուսաստանը կկանգնի եվրոպական ուղու վրա»։
Հիշեցնենք, որ այս տարվա սեպտեմբերի կեսերին էլ Սաակաշվիլին Գորիում հայտարարել էր, որ Ռուսաստանը դատապարտված է փլուզման, եթե շարունակի 19-րդ դարի զավթողական քաղաքականությունը։
Իսկ հոկտեմբերի սկզբին Սաակաշվիլին հայտարարել էր, որ նախագահական պաշտոնին Վլադիմիր Պուտինի վերադարձի պարագայում պատրաստ է երկխոսել նրա հետ։