«Ժառանգության» առաջարկած՝ ԼՂՀ անկախության ճանաչման նախագծի քվեարկությունը կոալիցիան երեկ բոյկոտեց: Այդ փաստի մասին խոսելով՝ «Ժառանգություն» կուսակցության առաջնորդ Րաֆֆի Հովհաննիսյանը հայտնեց, թե ԱԺ նախագահն ասաց, որ նման պահվածքին ցավով է վերաբերվում. «Ակնկալում էի, որ կլինեն մի շարք խղճով պատգամավորներ, ազատամարտիկներ, ովքեր կհասկանային, որ սա պետական շահին համապատասխան է»:
Հովհաննիսյանը տեղեկացրեց, որ նախորդ անգամ, երբ նախագիծը օրակարգում էր, ԱԺ նախագահը և կոալիցիան դիմել էին իրենց և ասել, որ արդեն հրահանգ է տրված դեմ քվեարկել նախագծին, ինչպես նաև խնդրել են Աստանայի գագաթնաժողովից առաջ հանել այն քվեարկությունից, քանի որ այնտեղ կարող է առաջընթաց գրանցվել: «Աստանան եկավ, անցավ, բայց կոալիցիայի դիրքորոշումը նույնը մնաց: ԼՂ ճանաչումը ոչ թե վնաս է մեր երկրին, այլ արժեք է: Մենք այլևս նման նախագիծ չենք ներկայացնի ԱԺ, թող քաղաքական մեծամասնությունը կողմնորոշվի, թե մինչև առաջիկա ընտրությունները ինչ իրավական բնութագրում է տալու Արցախին: Երեկվա քվեարկության ջրբաժանը առաջիկա ընտրությունների համար մղիչ խնդիր կլինի»:
Րաֆֆի Հովհաննիսյանի գնահատմամբ՝ ԼՂ անկախության ճանաչումով Հայաստանը պետք է ցույց տար, որ ինքը ինքնիշխան պետություն է, և միջազգային հանրության խնդիրը չէ դա` սա մեր հարցն է. «Այդ նույն Արևմուտքը ճանաչեց Կոսովոն, նույն Ռուսաստանը ճանաչեց Աբխազիան և Օսիան»:
Հովհաննիսյանի գնահատմամբ, «Ժառանգությունն» իր այս քայլով ոչ թե վնասեց բանակցային գործընթացին, այլ ցույց տվեց, որ ԼՂ ճանաչումը օրակարգային է: