Грузия Online-ի փոխանցմամբ՝ Վրաստանի ԱԳՆ-ն հաստատել է, որ Հայաստանի նախագահ Սերժ Սարգսյանի վրացական այցը հետաձգվել է։ Այս մասին լրագրողներին հայտարարել է փոխարտգործնախարար Դավիթ Ջալագանիան։
Վերջինս, սակայն, չի մանրամասնել Սարգսյանի վրացական այցի հետաձգման պատճառը։ Ջալագանիան միայն հայտարարել է, որ երբեմն այդպես էլ է պատահում։
Հիշեցնենք, որ հոկտեմբերի կեսերին Վրաստանի նախագահի մամլո քարտուղար Մանանա Մանջգալաձեն հայտարարել էր, որ Սերժ Սարգսյանը եռօրյա այցով Վրաստան է ժամանելու նոյեմբերի սկզբին։
Ի դեպ, երկուշաբթի օրը Հայաստան է ժամանելու Վրաստանի արտգործնախարար Գրիգոլ Վաշաձեն և հանդիպում է ունենալու Սերժ Սարգսյանի հետ։
