Վերահսկիչ պալատի հաշվետվությունում ներկայացված են շինարարական նյութերի գնագոյացման քաղաքականություն իրականացնող «Գնագոյացման վերլուծական ինֆորմացիոն կենտրոն» ՊՈԱԿ-ի կողմից կատարված մի շարք չարաշահումների վերաբերյալ բացահայտումներ: Այս մասին «Առաջին լրատվական»-ին հայտնեց ԱԺ «Ժառանգություն» խմբակցության պատգամավոր Անահիտ Բախշյանը: Այդ ՊՈԱԿ-ը քաղաքաշինության նախարարության ենթակայության տակ է: «Ըստ վերահսկիչ պալատի հաշվետվության՝ միայն 2009 թվականին բոլոր տեսակի շինանյութերի գծով դրանց շուկայական միջին գինը ավելացված է մոտ 50 տոկոսով: Մասնավորապես` տուֆ քարի միջին գինը 3600-5400 է եղել, բայց այդ ՊՈԱԿ-ը 7500 դրամ է նշել ու բյուջեից ստացել: Սալիկները` 3600 դրամ են եղել, իրենք ստացել են 5000 դրամ և այլն: Այսինքն` քաղաքաշինության նախարարության նախագծային հաշվարկները արվել են նման բարձր գներով, որի արդյունքում մոտ 30 մլրդ դրամի վնաս է տրվել պետությանը: Կառավարությունը գումար չի տալիս մանկատների երեխաներին բնակարաններով ապահովելու համար, հավելավճարներ չի տալիս գիտնականներին, բայց մենք հստակ ցույց ենք տալիս այն տեղը, թե որտեղից կարելի այդ գումարները տալ. պետք է պարզապես վերացնել այս այլանդակությունը»,- ասաց Ա. Բախշյանը: