Գրող Ջոան Ռոուլինգը`հրաշագործ Հարրի Փոթերի մասին գրքերի շարքի հեղինակը, մտածել է «փոթերիանայի» գլխավոր հերոսներից մեկին` Ռոն Ուիզլիին սպանելու մասին:
Ինչպես գրում է The Guardian-ը, այդ մասին Ռոուլինգը պատմել է Դենիել Ռեդկլիֆի հետ հարցազրույցի ժամանակ, որը պետք է DVD-ների վրա լույս տեսնի վերջին`«Հարրի Փոթեր և մահվան պարգևները» ֆիլմի երկրորդ մասի հետ:
Ռոուլինգը խոստովանել է, որ ի սկզբանե չի պլանավորել սպանել իր 3 հերոսներից ոչ մեկին, սակայն ինչ-որ պահի որոշել է, որ նրանցից մեկը պետք է սպանվի: «Ես իսկապես մտածել եմ դրա մասին ու ընտրությունս կանգ է առել Ռոնի վրա»,- հայտարարել է Ռոուլինգը: Հերոսներից մեկին սպանելու ցանկությունը հեղինակը բացատրել է շարքի ստեղծման ժամանակ առաջացած դեպրեսիայով:
Ավելի վաղ, նա խոստովանել էր, որ իր ամենասիրած հերոսը հենց Հարիի Փոթերն է, չնայած դրան, «փոթերիանայի» երկրպագուների մեծ մասը սիրում է հենց Ռոնին:
ԱՄՆ-ում Հարրի Փոթերի արկածների մասին պատմող ֆիլմի պրեմիերան տեղի է ունեցել 2011 թ. հուլիսի 15-ին: Վարձույթի հենց առաջին օրը ֆիլմը ռեկորդ սահմանեց ԱՄՆ-ում` հավաքելով 92,1 միլիոն դոլար:
«Մահվան շնորհները» ֆիլմի երկրորդ մասը վաճառքում կհայտնվի արդեն այս նոյեմբերին:
