Լրագրող Պետրոս Ղազարյանը Ej էլեկտրոնային ամսագրի իր բլոգում գրում է.
«Մենք գոհ ենք եղել Ալիկ Սարգսյանի աշխատանքից, նախագահն էլ է գոհ եղել, սակայն նրան նշանակելու ու ազատելու լիազորությունը նախագահինն է: Որոշվել է, որ պետք է կատարվի դերակատարների փոփոխություն»:
Ոստիկանապետ Ալիկ Սարգսյանի հրաժարականի տրամաբանությունը հասկանալու վերջին հույսերն իրեն հատուկ հակատրամաբանությամբ այսօր թաղել է Գալուստ Սահակյանը: Մինչև հիմա մտածում էի, որ ոստիկանապետին հեռացնում են, երբ
ա) քաղաքական թիմն է փոխվում,
բ) վատ է պայքարում հանցավորության դեմ,
գ) բարեփոխումներն արդյունավետ չի իրականացնում:
Բայց պարզվում է, որ բոլորը գոհ են Ալիկ Սերգեյիչի աշխատանքից: Ուրեմն կա մեկ այլ, սովորական մահկանացուներիս անհասանելի, չորրորդ պատճառ: Եվ ահա առաջ է գալիս Գալուս Սահակյանը և բացատրում անբացատրելին. «Մեծ քաղաքական թիմ է, և անընդհատ հնարավոր է դերակատարների փոփոխություն: Լուրջ փոփոխություններ չեն լինի, բայց ինչ-որ բաներ կլինեն»:
