ՀՀ փոխվարչապետ, տարածքային կառավարման նախարար, հայ-եգիպտական միջկառավարական հանձնաժողովի համանախագահ Արմեն Գևորգյանն այսօր ընդունել է Եգիպտոսի Արաբական Հանրապետության նորանշանակ արտակարգ և լիազոր դեսպան Մոհամեդ Ալա Էլդին Սաադ էլ Լեիսին:
Հանդիպման ընթացքում քննարկվել են հայ-եգիպտական միջկառավարական հանձնաժողովի աշխատանքներին, երկու երկրների միջև համագործակցութունը զարգացնելու հնարավորություններին վերաբերող հարցեր:
Փոխվարչապետը շնորհավորել է դեսպանին` Հայաստանում դիվանագիտական առաքելությունն ստանձնելու կապակցությամբ և կարևորել Եգիպտոսի հետ առկա հարաբերությունների զարգացումը` նշելով, որ կներդրվեն բոլոր ջանքերը երկու երկրների միջև ձևավորված գիտակրթական, մշակութային կապերի պահպանման, զարգացման ուղղությամբ:
Ա. Գևորգյանը կարծիք է հայտնել, որ այս առումով համագործակցության արդյունավետ հարթակ կարող է դառնալ արդեն ձևավորված միջկառավարական հանձնաժողովը: Անդրադարձ է կատարվել միջկառավարական հանձնաժողովի հետագա աշխատանքների կազմակերպման հարցերին:
Փոխվարչապետը կարևորել է Եգիպտոսի տեխնիկական աջակցության հիմնադրամի ծրագրերի իրականացումը Հայաստանում, ինչպես նաև ողջունել Հայաստանում առաջիկայում կազմակերպվելիք Եգիպտոսի մշակույթի օրերի անցկացումը:
Դեսպան Մոհամեդ Ալա Էլդին Սաադ էլ Լեիսին նշել է, որ Եգիպտոսը նույնպես շահագրգռված է զարգացնել Հայաստանի հետ հարաբերությունները և համագործակցության հնարավորություններ է տեսնում զբոսաշրջության, արդյունաբերության, մշակութային ոլորտներում: Նախատեսվում է ստեղծել նաև երկու երկրների գործարարների միություն:
Նրա խոսքով` հայ-եգիպտական միջկառավարական հանձնաժողովի նիստը հնարավոր կլինի անցկացնել Եգիպտոսում նոր կառավարության ձևավորումից հետո, երբ կհաստատվի միջկառավարական հանձնաժողովի եգիպտական կողմի կազմը: Մինչ այդ պայմանավորվածություն է ձեռք բերվել, որ կողմերը կգույքագրեն համագործակցության հնարավոր ոլորտները:
Դեսպանը ներկայացրել է Եգիպտոսում առկա իրավիճակը և երկրի կայունացմանն ուղղված ժամանակավոր կառավարության նախաձեռնած քայլերը:
