Նյու Յորքում երեքշաբթի երեկոյան Christie’s աճուրդի տունը կանցկացնի «Իմպրեսիոնիզմի և մոռեդնիզմի արվեստը» խորագրով աճուրդ: Աճուրդին կներկայացվեն 84 միավոր ստեղծագործություններ, ընդհանուր առմամբ՝ 200 միլիոն դոլար արժողությամբ:
Աճուրդի անվիճելի զարդը Էդգար Դեգայի «Փոքրիկ 14-ամյա պարուհին» է, որի նախնական գինը 25-35 միլիոն դոլար է: Ինչպես հաղորդում է РИА Новости-ն, այս աշխատանքը ամենաաչքի ընկնող ու մոդեռնիզմի շրջանի նորարարական քանդակներից է:
«Ինչպես ցույց է տալիս փորձը, հավաքորդների համար չափանիշ են մնում Պիկասոյի աշխատանքները: Վերջին տարում նրա 4 աշխատանքները աճուրդում վաճառվել են յուրաքանչյուրը 15 միլիոն դոլարից ավելի արժողությամբ»,- հայտարարել է Christie’s-ի ամերիկյան բաժանմունքի ներկայացուցիչ և տնօրեն Մարկ Փորթերը:
Այսօր կայանալիք աճուրդում նախատեսված է վաճառել նաև Պաբլո Պիկասոյի` 1930-ականներին նկարած երկու դիմանկարները: 12-18 միլիոն դոլար նախնական արժողությամբ կտավների վրա պատկերված են նկարչի սիրեցյալները` Մարի-Թերեզ Վոլտերը և Դորա Մաարը:
«Մարի-Թերեզ Վոլտերի դիմանկարը, որը հայտնի է «Ննջող աղջիկը» վերնագրով, Պիկասոն ավարտել է 1935 թ. հունվարի 17-ին: Այն պատկերում է բնորդուհու մեղմ խառնվածքը։ Իսկ «Բաց մանուշակագույն գլխարկով աղջիկը», որտեղ պատկերված է Դորա Մաարը, ընդգծված երևում է Երկրորդ համաշխարհային պատերազմի սպասման անորոշությունը»,- նշված է աճուրդի տան պաշտոնական հաղորդագրությունում:
2010 թ. Վոլտերի դիմանկարը, որը Պիկասոն վրձնել էր 1932 թ., Christie’s-ում վաճառվեց ռեկորդային` 106,5 միլիոն դոլարով` դառնալով աճուրդի տան պատմության մեջ ամենաթանկ վաճառված արվեստի ստեղծագործությունը: