Թռչկանի «սահմանապահները» շարունակելու են պահպանել Թռչկանը, թեև «Ռոբշին» ՍՊԸ-ի տարածած հաղորդագրությանը, որի մեջ ասվում է, որ «Ռոբշին» ՍՊԸ-ն դադարեցնում է Թռչկանի ջրվեժի տարածքում Չիչխան գետի վրա կառուցվող հիդրոէլեկտրակայանի շինարարությունը և տեխնիկան դուրս է բերում շինարարության տարածքից՝ ընդունելով Բնապահպանության նախարարության առաջարկությունը, ինչպես նաև քաղաքական, տարաբնույթ շահարկումները կանխելու նպատակով։
«Պահպանենք Թռչկանի ջրվեժը» նախաձեռնության անդամները նույնպես ծանոթ են «Ռոբշին» ընկերության տարածած հայտարարությանը, սակայն նրանց համար դա հիմք չէ, քանի որ նրանք սպասում են պաշտոնական որոշման: «Մենք շարունակելու ենք մեր բողոքի ակցիան, վաղը մեր բողոքի ցույցը Բնապահպանության նախարարության շենքի առջև տեղի է ունենալու, քանի դեռ չկա որևէ պաշտոնական հայտարարություն, որ փորձաքննական եզրակացությունը չեղյալ է համարվում, որ հողերի կատեգորիան նորից չի փոփոխվել»,- նշեց «Պահպանենք Թռչկանի ջրվեժը» նախաձեռնության ակտիվիստ Արմեն Վերմիշյանը`հավելելով, որ այս պահի դրությամբ Թռչկանում բնակություն հաստատած բնապահպանները չեն հայտնել այն մասին, որ շինտեխնիկան հանվել է ջրվեժի տարածքից: Ըստ բնապահպանի` սա ընդամենը հայտարարություն է, մինչև չստանան պաշտոնական որոշումները, որոնք չեղյալ են համարելու ոչ միայն «Ռոբշին», այլև ուրիշ ընկերությունների հավակնությունները տվյալ տարածքում ՀԷԿ կառուցելու վերաբերյալ, չեն դադարեցնելու իրենց պայքարը:
«Թռչկանի սահմանները պինդ են, մեր սահմանապահները կանգնած են այնտեղ և շարունակելու են իրենց գործունեությունը մինչ լինի պաշտոնական հայտարարություն»,- ամփոփեց Ա. Վերմիշյանը:
