«Եթե ուղևորափոխադրումներ իրականացնող կազմակերպությունը չի կատարում իր գործառույթներն ու պարտականություններն ըստ օրենքի, ապա դա արդեն օրենքի խախտում է, և դրա համար կան սանկցիաներ, իսկ եթե խոչըդոտում է որևէ մեկի ազատ տեղաշարժի իրավունքը, ապա, իհարկե, դա մարդու իրավունքների խախտում է»,- պատասխաելով լրագրողների հարցին, թե արդյոք մարդու իրավունքների խախտո՞ւմ է այն հանգամանքը, որ ՀԱԿ հանրահավաքների օրը մարզերից Երևան եկող տրանսպորտային միջոցները չեն գործում՝ կարծիք հայտնեց ՀՀ Մարդու իրավունքների պաշտպան Կարեն Անդրեասյանը:
Նա տեղեկացրեց, որ ՄԻՊ գրասենյակն արդեն իսկ ստացել է մեկ գրավոր դիմում այդ խնդրով, և այդ ուղղությամբ աշխատում են պետական համապատասխան մարմնի հետ` ճշտելու համար և խախտումը, և դրան հետևող հնարավոր սանկցիաները. «Ես չեմ կարող կանխատեսել՝ հետագայում կլինե՞ն խախտումներ, թե՞ ոչ, բայց ամեն եղած խախտման փորձում ենք տալ հնարավորինս իրավական և արագ արձագանք»:
Պաշտպանը նկատեց, որ տրանսպորտային կազմակերպությունները պետք է գիտակցեն, որ անգամ մեկ անձի տեղաշարժի իրավունքի խոչընդոտումը իրավախախտում է: