Սերբական արմատական կուսակցության առաջնորդ Վոիսլավ Շեշելը նախկին Հարավսլավիայի հարցով միջազգային դատարանի կողմից դատապարտվել է մեկուկես տարվա ազատազրկման` դատարանի նկատմամբ անհարգալից վերաբերմունքի համար: Ինչպես հայտնում է Associated Press գործակալությունը, նրան դատապարտել են դատական գործընթացի ժամանակ իր դեմ վկայություն տվող 11 վկաների անձնական տվյալները իր գրքում բացահայտելու համար:
Ինչպես հայտնում է B92 հեռուստառադիոընկերությունը` այդ վկաներից շատերը դատարանում հայտնել են, որ չեն թաքցրել իրենց անունները: Արդյո՞ք այդ հանգամանքը ազդել է դատավճռիը կայացման վրա՝ հայտնի չէ: Շեշելին, որը 2003 թվականից գտնվում է կալանքի տակ, արդեն երկրորդ անգամ մեղադրում են դատարանի նկատմամբ անհարգալից վերաբերմունքի համար: 2009 թվականի հուլիսին, կրկին վկաների անձնական տվյալների բացահայտման համար, նա դատապարտվել էր 15 ամիս ազատազրկման:
Ինչպես նշում է գործակալությունը, այդ դատավճիռները Շեշելի համար նշանակալի ազդեցություն չունեն, քանի որ նրա դեմ դատական գործընթացը տեղի է ունենում Հաագայում: Նրան մեղադրում են զինվորական հանցագործությունների, մասնավորապես՝ հարավսլավական պատերազմի ժամանակ սպանությունների, տանջանքների, բնակչությանը վերաբնակվել ստիպելու և հետապնդումների մեջ:
Շեշելը չի ընդունում իր դեմ ներկայացված մեղադրանքները և մի քանի անգամ փորձել է դրանք բողոքարկել, սակայն ապարդյուն: 2011 թվականի հոկտեմբերի սկզբին նրա փաստաբանը հայտարարել է, որ Շեշելի դատական գործընթացները չափազանց ձգձգվում են:
