Շվեյցարիայի նախագահ Միշելին Կալմի Ռեյը այսօր ժամանում է Վրաստան, որտեղ կհանդիպի Վրաստանի նախագահ Միխեիլ Սաակաշվիլիի հետ:
Ինչպես այսօր ճեպազրույցում հայտնել է Վրաստանի արտգործնախարար Նինո Կալանդաձեն, Բաթումում երկու երկրների նախագահները կքննարկեն Առևտրի համաշխարհային կազմակերպությանը` ԱՀԿ-ին, Ռուսաստանի անդամակցության տեխնիկական հարցերը:
Վրաստանը ընդունել է Շվեյցարիայի առաջարկությունները ԱՀԿ-ին Ռուսաստանի անդամակցության պայմանների վերաբերյալ` համաձայնելով Ռուսաստանից դեպի Աբխազիա և Հարավային Օսիա բեռնափոխադրումների շրջանառության միջազգային մոնիտորինգին:
Սակայն Ռուսաստանի նախագահի հետ երեկվա հանդիպումից հետո Շվեյցարիայի նախագահ Միշելին Կալմի Ռեյը որոշել է բանակցություններ անցկացնել Մ. Սաակաշվիլիի հետ՝ ինչպես հայտնում է ռուսական կողմը` «տեխնիկական հարցերը կարգավորելու նպատակով»:
Հիշեցնենք, որ հինգշաբթի օրը Ժնևում համաձայնություն է ձեռք բերվել ԱՀԿ-ին Ռուսաստանի անդամակցության վերաբերյալ Ռուսաստանին ու Վրաստանին շվեյցարական կողմի ներկայացրած փոխզիջումային տարբերակի շուրջը։
Ռուսաստանը ԱՀԿ-ին փորձում է անդամակցել 1993-ից, սակայն այդ գործընթացի վրա շարունակ վետո է դնում Վրաստանը։ 2008 թ. օգոստոսին տեղի ունեցած ռուս-վրացական հնգօրյա պատերազմից հետո առաջին անգամ Ռուսաստանն ու Վրաստանն այս տարվա մարտի 10-ին Շվեյցարիայի Բեռն քաղաքում ԱՀԿ-ին Ռուսաստանի անդամակցության համար նստեցին բանակցությունների սեղանի շուրջը, դրանք, սակայն, ավարտվեցին անարդյունք։
