«Միջազգաին նորմերի համաձայն` երեխային պետք է մայրական կաթով կերակրել վեց ամիս»,- այսօր լրագրողների հետ հանդիպման ժամանակ տեղեկացրեց Մոր և մանկան առողջության վարչության պետ Կարինե Սարիբեկյանը` խոսելով երեխային մայրական կաթով և կոնսերվանտներով հարուստ կերերով կերակրելու տարբերությունների ու վտանգների մասին:
Ըստ Կ. Սարիբեկյանի` կրծքով կերակրումը աջակցության կարիք ունի, և այս խնդրով շահագրգիռ անձինք երկար ճանապարհ են անցել՝ մինչ մանկական կերերի գովազդները դուրս գան մեր եթերից: Բանախոսը համոզված է, որ ավելի կտրուկ միջոցներ են հարկավոր: «Երեխայի կյանքի ամենակարևորը առաջին տարիներն են, մայրական կաթով սնված երեխաներն ավելի առողջ են: Կա հետազոտություն` մահացած երեխաների խմբում տասը տոկոսը մեկ ամիս են կերակրվել մայրական կաթով, իսկ կենդանի երեխաների դեպքում` հինգ ամիս, մահացած երեխաների դեպքում երեսուն տոկոսն են կերակրվել կրծքով, իսկ կենդանի երեխաներից ութսուն տոկոսը»,- նշեց Սարիբեկյանը՝ ընդգծելով, որ պաշտոնական վիճակագրությունը փաստում է, որ երեխաները գոնե չորս ամիս մայրական կաթով են սնվում են:
«Հայաստանում 60 երեխայի կյանք կարելի է փրկել կրծքով կերակրման արդյունքում»,- համատեղ ասուլիսի ընթացքում ասաց և «Վստահություն առողջապահական» ՀԿ-ի նախագահ, մանկաբույժ Սուսաննա Հարությունյանը` հավելելով, որ կրծքով կերակրված և երեխայի և կերակրող մոր առողջությունն ավելի պաշտպանված է: Ըստ նրա` մայրական կաթով սնված երեխաների մտավոր ունակություններն ավելի լավն են: Ուստի պետք է երեխաներին վեց ամիս կերակրել կրծքով, իսկ եթե դա հնարավոր չէ, ապա պետք է փոխարինել կենդանական կաթով, բայց ոչ կաթնախառնուրդներով:
Ասուլիսին ներկա ՀՀ առողջապահության նախարարության աշխատակազմի ղեկավար Սուրեն Քրմոյանն ասաց, որ այս ուղղությամբ 1990-ական թթ ՀՀ կառավարությունը իրականացնում էր «Կրծքով կերակրման խրախուսում» ծրագիրը, որը մինչ այժմ իրականացվում է: Ըստ նրա՝ շուտով արգելվելու են մանկական կերերի բոլոր գովազդները:
