Եթե բանակի հասցեին հերյուրանքներ են տարածվում, մեղադրանքները պետք է կոնկրետ ժամի, կոնկրետ տեղում ապացուցվեն, բայց միայն արատավոր երևույթների դեմ պայքարելու համար մարդկանց իրավական պատասխանատվության ենթարկելը կարող է թեման բարձրացնողների հանդեպ որպես մահակ դիտվել: «Առաջին լրատվական»-ի հետ զրույցում այս մասին ասաց «Չենք լռելու» երիտասարդական նախաձեռնության անդամ Վարդան Հովհաննիսյանը` անդրադառնալով ՀՀ պաշտպանության նախարար Սեյրան Օհանյանի այն հայտարարությանը, թե իրենք անընդունելի են համարում որոշ խմբերի կողմից բանակի խնդիրների միտումնավոր և ամենօրյա շահարկումը:
Նրա խոսքով՝ բանակի հասցեին հերյուրանքներ տարածել ոչ մի դեպքում չի կարելի: «Facebook-ում, օրինակ, կան մարդիկ, ովքեր որպես գլխավոր`«Չեմ տա զավակիս բանակ» մակագրությամբ նկար են տեղադրել: Սա շատ սխալ մոտեցում է, բա ո՞վ պաշտպանի երկիրը: Ահավոր վատ երևույթներ կան, բայց դրանց դեմ այլ մեթոդներով է պետք պայքարել: Այդ տեսակ քարոզչությունը վտանգավոր է մեզ համար»,- նկատեց նախաձեռնության ներկայացուցիչը:
Նա նաև ընդգծեց, որ իրենց տիրապետած տեղեկատվությանը շատ պատասխանատու են վերաբերվում: «Եթե ինչ-որ հերյուրանքի կասկած կա, մենք պատրաստ ենք հակառակն ապացուցել: Մեր քննադատությունը միայն կառուցողական է: Եթե այլ կարծիքներ կան, մենք պատրաստ ենք վիճել: Բայց եթե հերյուրանք, թյուրիմացություն կա, և դրանց նպատակաուղղվածությունն ապացուցվի, ինձ թվում է արժե պատժել այն տարածողներին»,- նկատեց Հովհաննիսյանը:
Ամփոփելով`«Չենք լռելու» երիտասարդական նախաձեռնության անդամը մեկ անգամ ևս շեշտեց, որ բանակում կատարվող իրադարձությունների մասին խոսելը դեռ շահարկում չէ, շահարկում կարող է լինել միայն իրավիճակը գրոտեսկային չափերով ներկայացնելը:
Նշենք, որ երեկ` հոկտեմբերի 28-ին, ՀՀ պաշտպանության նախարարությունում տեղի ունեցած կոլեգիայի նիստում Պնախարար Սեյրան Օհանյանն անդրադարձել էր նաև բանակի խնդիրների շուրջ հասարակական քննարկումներին: Պաշտպանության նախարարը մասնավորապես ասել էր. «Մենք հասկանում և ընդունում ենք արտակարգ պատահարներից հետո հասարակության կողմից բանակին ուղղված կառուցողական քննադատությունը, ավելին` այդ քննադատությունը օգտակար է և պետք է դասեր քաղել դրանից, սակայն անընդունելի ենք համարում որոշ խմբերի կողմից բանակի խնդիրների միտումնավոր և ամենօրյա շահարկումը: Այսուհետև պաշտպանական գերատեսչությունը առավել խիստ մոտեցում է ցուցաբերելու բոլոր նրանց նկատմամբ, ովքեր բանակը վարկաբեկում են ամեն գնով, ու եթե այդ մարդիկ կեղծ տեղեկություններ և հերյուրանքներ տարածելով փորձեն վնաս հասցնել բանակին, իրավական դաշտում նրանց պատասխանատվությունը լինելու է անխուսափելի»: