ՀԱԿ ակտիվիստ Վարդգես Գասպարին չի ընկրկելու և անկախ բողոքի ակցիաների արդյունքում ոստիկանական բաժանմունքներում կրկին հայտնվելու հեռանկարից`շարունակելու է իրավապաշտպան գործունեություն ծավալել: Այս մասին նա հայտարարեց «Առաջին լրատվական»-ի հետ զրույցում:
«Երկուշաբթի օրը արդեն իսկ մասնակցել եմ ՀԱԿ ակտիվիստ Տիգրան Առաքելյանին ազատ արձակելու պահանջով քաղաքացիական ակցիային, հինգշաբթի օրն էլ անպայման կլինեմ կառավարության շենքի առջև»,- նկատեց նա:
Ակտիվիստը միաժամանակ դժվարացավ նշել` խնդիրների մասին բարձրաձայնողների հանդեպ ճնշումներն արդյո՞ք պայմանավորված են նախընտրական շրջանի ոչ պաշտոնական մեկնարկով, թե ոչ: «Չգիտեմ: Դա, գուցե, պայմանավորված է մարդկանց ակտիվության մեծացմամբ: Երբ ինչ-ինչ հարցեր հասարակական ավելի մեծ հնչեղություն ստանան, ինձ թվում է` նրանք ավելի զգույշ կլինեն, բայց ինչպես փորձն է ցույց տալիս, կարող է բիրտ ուժի դիմեն: Բայց մինչև մարդկանց ոստիկանական բաժանմունք տանելը նրանց այլ միջոցներով էլ են ահաբեկում: Վերջերս ինձ մի անձնավորություն հանդիպեց, ես իրեն, ճիշտ է, չհիշեցի, բայց ինքն ասաց, որ 2008 թվականին Արաբկիրի բաժնում տեսել է ինձ: Ուրեմն, 2008 թվականի մարտի 1-ին իրեն բերման են ենթարկել: Նա ասաց, որ այն ժամանակվանից ի վեր վարչական մեթոդներով ազդում են իր վրա, թաղապետարանից գալիս, հարցնում են` հո հանրահավաքների չե՞ս գնում»,- նշեց Վարդգես Գասպարին:
Հիշեցնենք, որ բանակում խաղաղ պայմաններում մահացած զինվորների ծնողների` հոկտեմբերի 20-ին կառավարության շենքի մոտ անցկացվող բողոքի ցույցին մասնակցող Հայ ազգային կոնգրեսի ներկայացուցիչ Վարդգես Գասպարին բռնության գործադրմամբ տեղափոխվել էր ՀՀ ոստիկանության Կենտրոնի քննչական բաժին և ապօրինաբար ձերբակալվել։
Գասպարիին ձերբակալել էին խուլիգանության և իշխանության ներկայացուցչի նկատմամբ բռնություն գործադրելու համար՝ Քրեական օրենսգրքի 258 հոդվածի 1-ին մասին և 316 հոդվածի 1-ին մասի հատկանիշներով: Դատարանը նրա նկատմամբ կիրառել էր ութ հարյուր հազար դրամի գրավ:
ՀԱԿ-ն ամբողջությամբ վճարել է Վարդգես Գասպարիի նկատմամբ դատարանի կիրառած գրավը: