Պետք չէ պաշտոնյաների հրաժարականները դիտել հակասությունների դաշտում, քանի որ որևէ պաշտոն կամ գործ հավերժ չէ: «Առաջին լրատվական»-ի հետ զրույցում նման տեսակետ հայտնեց ԱԺ Հանրապետական պատգամավոր Հովհաննես Սահակյանը` անդրադառնալով Երևանի քաղաքապետ Կարեն Կարապետյանի հրաժարականի թեմային:
«Պարզ է, որ եթե կան երիտասարդ կադեր, ապա փոփոխությունների արդյունքում պետք է լինեն և՛ որոշակի առաջխաղացումներ, և՛ տեղափոխություններ: Այսինքն` գործընթացն, ընդհանուր առմամբ, պետք է շարժման մեջ դիտարկել»,- նկատեց պատգամավորը` հիշեցնելով, որ, ըստ մամուլում շրջանառվող լուրերի, Կարեն Կարապետյանը տեղափոխվել է այլ աշխատանքի:
Հարցին` երիտասարդ կադերի մասին հիշատակումը կարո՞ղ է նշանակել, որ Երևանի քաղաքապետի պաշտոնն արդեն իսկ կանխորոշված է երիտասարդ մի պաշտոնյայի համար, Հովհաննես Հովհաննիսյանն ասաց. «Հանրապետական կուսակցությունը՝ որպես ժողովրդավար կառույց, խորհրդի նիստ պետք է հրավիրի և այնտեղ որոշի հարցը: Սակայն դեռևս խորհրդի նիստ չենք հրավիրել և նման որոշում դեռևս չենք կայացրել»:
Հետաքրքրվեցինք`գործնականում հնարավո՞ր է, որ Երևանի քաղաքապետի պաշտոնը վերստին առաջարկվի նախկին քաղաքապետ Գագիկ Բեգլարյանին, ինչին ի պատասխան ՀՀԿ-ական պատգամավորը նկատեց. «Ես բավական դրական կարծիք ունեմ մեր բոլոր կուսակից ընկերների մասին, սակայն այս պահին զերծ կմնամ թեկնածուների հետ կապված որևէ մեկնաբանությունից: Սպասենք խորհրդի որոշմանը»:
