«Բանակն իրականում» քաղաքացիական նախաձեռնության ներկայացուցիչ, ակտիվիստ Լալա Ասլիկյանն իր հանդեպ ոստիկանության վերջին գործողությունները հակված չէ պայմանավորել հատուկ գործոնով` մասնավորապես նախընտրական շրջանում խնդիրների մասին բարձրաձայնող մարդկանց լռեցնելու և ճնշելու փորձով: Այս մասին նա ասաց «Առաջին լրատվական»-ի հետ զրույցում` հավելելով, որ ճնշումներն ակտիվիստների նկատմամբ ամենօրյա բնույթ են կրում:
«Ընտրություններն իմիտացիա են: Այս ամենը ոչ թե կապված է ընտրությունների հետ, այլ ուղղակի ամենօրյա իրավիճակ է: Երբ մարդն ուզում է ասել ավելին, քան սովորական քաղքենին` իր տանը նստած, պետք է իմանա, որ ճնշման և հակազդեցության է հանդիպելու: Սա պետության հատուկ գործելակերպն է, ոստիկանության կիրառած մեթոդները: Այնպես որ, ակտիվիստների հանդեպ ճնշումներ ընտրություններից առաջ էլ են լինելու, ընտրություններից հետո էլ»,- նկատեց Լալա Ասլիկյանը:
Հարցին` կառավարության շենքի դիմաց բողոքի ակցիայի հետևանքով ոստիկանական բաժանմունք տարվելուց հետո պատրաստվո՞ւմ է կրկին մասնակցել դրանց և չի՞ վախենում կրկին ոստիկանություն տարվելուց, ակտիվիստը պատասխանեց. «Վախ դժվար ներշնչեն: Եթե ես կանգնած եմ և ասում եմ, որ իրենք հանցագործ են, խուլիգան են, և իրենք վիրավորվում են, պետք է դատարան դիմեն և ինձ պատասխանատվության կանչեն, բայց ոչ թե ինձ բռնի ուժով տանեն ոստիկանություն, դա հիմարություն է, ոնց որ տուն-տունիկ լինի: Հինգշաբթի օրերը մենք, իհարկե, շարունակելու ենք մեր ակցիաները կառավարության շենքի դիմաց»:
Ամփոփելով` նա նշեց, որ ոստիկանական բաժանմունքում իր հանդեպ բռնություններ չեն կիրառվել, միայն ոստիկանություն տեղափոխելու ճանապարհին կոպիտ են խոսել և պահանջել են անջատել հեռախոսը: