News Georgia-ի փոխանցմամբ՝ հինգշաբթի օրը Ժնևում համաձայնություն է ձեռք բերվել Առևտրի համաշխարհային կազմակերպությանը (ԱՀԿ) Ռուսաստանի անդամակցության վերաբերյալ Ռուսաստանին ու Վրաստանին շվեյցարական կողմի ներկայացրած փոխզիջումային տարբերակի շուրջը։
Շվեյցարական առաջարկը ենթադրում է մեխանիզմի ստեղծում, որը վերահսկելու է ռուս-վրացական սահմանին ընկած միջանցքներով բեռների փոխադրումն ու շրջանառությունը։ Այդ մեխանիզմը բաղկացած է երկու բաղադրատարրերից. դա լինելու է էլեկտրոնային ռեժիմով միջազգային դիտարկում և տեղեկատվության վերահսկում։
Դրանից հետո Վրաստանի փոխարտգործնախարար Թոռնիկե Գորդաձեն հայտարարել է, որ սկզբունքորեն բավարարվել են ԱՀԿ-ին Ռուսաստանի անդամակցությանն առնչվող վրացական կողմի պահանջները, և որ վրացական կողմը սպասում է Ռուսաստանի պատասխանին։
Փոխարտգործնախարար Դավիթ Ջալագանիան հայտարարել է, որ Ռուսաստանը ներքին PR-ի հետ կապված խնդիրներ ունի և չգիտի ինչպես իրազեկել սեփական բնակչությանը, որ Վրաստանը տվյալ հարցում նրան գործնականում մերժելու հնարավորություն չի թողել։
Փոխարտգործնախարար Սերգի Կապանաձեն էլ ընդգծել է, որ ԱՀԿ-ին Ռուսաստանի անդամակցության հարցում գնդակը ռուսական կողմի դաշտում է, և քայլ անելու հերթը նրանն է։
Հիշեցնենք, որ Ռուսաստանը ԱՀԿ-ին փորձում է անդամակցել 1993 թվականից։ Դրա վրա շարունակ վետո է դնում Վրաստանը։ 2008 թվականի օգոստոսին տեղի ունեցած ռուս-վրացական հնգօրյա պատերազմից հետո առաջին անգամ Ռուսաստանն ու Վրաստանն այս տարվա մարտի 10-ին Շվեյցարիայի Բեռն քաղաքում ԱՀԿ-ին Ռուսաստանի անդամակցության համար նստեցին բանակցությունների սեղանի շուրջը, դրանք, սակայն, ավարտվեցին անարդյունք։
