Ադրբեջանական 1news.az-ի փոխանցմամբ՝ ադրբեջանական «Շահ Դենիզ» գազային հանքավայրի կոնսորցիումի կազմում ընդգրկված բրիտանական British Petroleum (BP) ընկերության տարածաշրջանային նախագահ Ռաշիդ Ջավանշիրը մեկնաբանել է հոկտեմբերի 25-ին Իզմիրում Թուրքիայի և Ադրբեջանի միջև գազային համաձայնագրերի փաթեթի կնքումը, որն առնչվում է դեպի Եվրոպա թուրքական տարածքի միջոցով ադրբեջանական գազի տարանցմանը։
Ջավանշիրը նշել է. «Մենք ողջունում ենք «Շահ Դենիզ» գազային հանքավայրի գազի վաճառքի ու տարանցման մասին Թուրքիայի ու Ադրբեջանի միջև միջկառավարական համաձայնագրի կնքումը։ Մենք հավատում ենք, որ այդ երկու երկրները կօգնեն Եվրոպայի համար բացելու «Հարավային գազային միջանցք»-ը։ Բացի այդ, դրանով Ադրբեջանն ու Թուրքիան միմյանց կկապվեն ևս մեկ ռազմավարական գործընկերությամբ։
Թուրքիայի և Ադրբեջանի միջև այդ գազային համաձայնագրերի կնքումը «Շահ Դենիզ»-ի կոնսորցիումին հնարավորություն կընձեռի շարունակել խողովակաշարի երթուղու ընտրության գործընթացը։ Մենք շնորհավորում ենք Թուրքիային ու Ադրբեջանին այդ չափազանց կարևոր համաձայնագրերի կնքման կապակցությամբ»։
Հիշեցնենք՝ պլանավորված է, որ «Շահ Դենիզ» գազային հանքավայրի երկրորդ փուլը մեկնարկելու է 2017 թվականին և տարեկան արդյունահանվելու է 16 միլիարդ խորանարդ մետր գազ, որից 6 միլիարդ խորանարդ մետրը վաճառվելու է Թուրքիային, իսկ 10 միլիարդ խորանարդ մետրը թուրքական տարածքով տարանցվելու է դեպի Եվրոպա։
