Չինաստանի իշխանությունները համաձայնել են Ֆինանսական կայունության եվրոպական հիմնադրամում (EFSF) ներդրումներ կատարել, որը օգնելու է եվրագոտուն հաղթահարել պարտքային ճգնաժամը:
Ինչպես հայտնում է France-Presse գործակալությունը, հղում կատարելով դիվանագիտական անանուն աղբյուրներին, Չինաստանի ներդրման չափերը հիմնադրամում և դրանց պայմանները չեն պարզաբանվում:
Չինաստանի ֆինանսների նախարարությունում և Չինաստանի ազգային բանկում հրաժարվում են մեկնաբանել այդ տեղեկությունը: Չինաստանի արտաքին գործերի նախարարության ներկայացուցիչը` Ցզյան Իուին, հայտարարել է, որ Չինաստանը պատրաստ է Եվրոպայի հետ քննարկել տնտեսական համագործակցության վերաբերյալ ցանկացած առաջարկ:
France-Presse գործակալությունը նշում է, որ EFSF նախագահ Կլաուս Ռեգլինգը Պեկին կայցելի ուրբաթ՝ քննարկելու Չինաստանի` Ֆինանսական կայունության հիմնադրամում մասնակցություն ունենալու մանրամասները:
Ֆինանսական կայունության հիմնադրամում ներդրումներ կատարելու պատրաստակամություն է հայտնել նաև Նորվեգիան: Երկրի ֆինանսների նախարար Սիգբյորն Յոնսենը Bloomberg գործակալությանը տված հարցազրույցում նշել է, որ Օսլոն Եվրոպային օգնություն կցուցաբերի բարեկեցության ազգային հիմնադրամից, եթե եվրագոտին օգնություն խնդրի:
Եվրոպայի ֆինանսական կայունության հիմնադրամը հիմնվել է անցած տարի: Հիմնադրամի ծավալը կազմում է 440 միլիարդ եվրո:
Մինչդեռ սեպտեմբերի 14-ին Xinhua գործակալությունը հայտնել էր, որ Չինաստանը հույս ունի, որ եվրոպական երկրները ֆինանսական աջակցության դիմաց կհամաձայնեն չինական տնտեսությանը տրամադրել շուկայական կարգավիճակ: