Ռուսական Regnum լրատվական գործակալության փոխանցմամբ՝ այս տարվա առաջին 9 ամիսների արդյունքները ցույց են տվել, որ Վրաստանի հիմնական արտահանման շուկաներն են Ադրբեջանը, Հայաստանը և Թուրքիան։ Այս մասին են վկայում Վրաստանի ազգային վիճակագրական ծառայության տվյալները։
2011 թվականի հունվար-սեպտեմբեր ամիսներին Վրաստանից դեպի Ադրբեջան արտահանումը կազմել է ավելի քան 270 միլիոն դոլար, ինչը 96 միլիոն դոլարով ավելի է՝ համեմատած նախորդ տարվա միևնույն ժամանակահատվածի հետ։
Երկրորդ տեղում է Հայաստանը՝ 166 միլիոն դոլար, սա 55 միլիոն դոլարով ավելի է՝ նախորդ տարվա միևնույն ժամանակահատվածի համեմատ։ Լավագույն եռյակը եզրափակում է Թուրքիան՝ 162 միլիոն դոլար։ Հատկանշականն այն է, որ այս տարվա առաջին 9 ամիսներին, նախորդ տարվա նույն ժամկետի համեմատ, դեպի Թուրքիա արտահանումը նվազել է 0.7 միլիոն դոլարով։
Վրաստանի ներկրման գործընթացում առաջատարի դերը շարունակում է կայուն պահպանել Թուրքիան՝ 901 միլիոն դոլար, ինչը 295 միլիոն դոլարով գերազանցում է նախորդ տարվա միևնույն ժամանակահատվածի ցուցանիշը։ Երկրորդ տեղը զբաղեցնում է Ուկրաինան՝ 519 միլիոն դոլար (142 միլիոն դոլարով ավելի), իսկ երրորդ տեղը՝ Ադրբեջանը՝ 443 միլիոն դոլար (116 միլիոն դոլարով ավելի)։
Ընդհանուր ապրանքաշրջանառության ցուցանիշով դարձյալ առաջատարը Թուրքիան է՝ 1063 միլիոն դոլար, ապա գալիս են Ադրբեջանը՝ 713 միլիոն դոլար և Ուկրաինան՝ 613 միլիոն դոլար։
Այս տարվա առաջին 9 ամիսներին Վրաստանի արտաքին առևտրի ծավալը կազմել է 6481 միլիոն դոլար, ինչը 39 տոկոսով ավելի է՝ համեմատած նախորդ տարվա միևնույն ժամանակահատվածի հետ։ Մասնավորապես, վրացական արտահանումը կազմել է 1552 միլիոն դոլար (աճել է 42 տոկոսով), իսկ ներկրումը՝ 4929 միլիոն դոլար (աճել է 38 տոկոսով)։
ԵՄ հետ Վրաստանի արտաքին առևտրի ծավալն աճել է 38 տոկոսով՝ հասնելով 1686 միլիոն դոլարի, իսկ ԱՊՀ երկրների հետ՝ 42 տոկոսով՝ հասնելով 2148 միլիոն դոլարի։
