Ինչպես տեղեկացնում է «Առաջին լրատվական»-ը,
ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է Բրազիլիայի Սան Պաուլո նահանգի Օզասկոյի քաղաքապետ Էմիդիո դե Սոուզայի գլխավորած պատվիրակությանը:
Ողջունելով հյուրերին` փոխվարչապետը նշել է երկու երկրների միջև ավանդաբար ջերմ և բարեկամական հարաբերությունները` նկատելով, որ Հայաստանում դեսպանատան բացումը երկկողմ հարաբերությունների խորացման նոր հնարավորություններ է ստեղծել:
Նա շնորհակալություն է հայտնել Հայաստանում Բրազիլիայի դեսպանին, ով աջակցում է երկու երկրների միջև ապակենտրոնացված մակարդակով համագործակցության խորացմանը, ինչին մեծ կարևորություն է տալիս ՀՀ կառավարությունը:
Փոխվարչապետի խոսքով` երկու երկրների տարածաշրջանների միջև ուղիղ փոխգործակցությունը հնարավորություն է ստեղծում երկկողմ առևտրատնտեսական հարաբերությունների զարգացման համար:
Նա գոհունակություն է հայտնել Գյումրիի և Օզասկոյի միջև ծավալվող գործակցության առնչությամբ ` նկատելով, որ անգամ տարածությունը չի կարող խոչընդոտ լինել բարեկամ ժողովուրդների միջև հարաբերությունների խորացման համար:
Քաղաքապետ Էմիդիո դե Սոուզան տեղեկացրել է, որ Գյումրիի տեղական իշխանությունների հետ քննարկել են քույր քաղաքների միջև կապերի զարգացման ուղղությունները` ընդգծելով, որ առկա է համագործակցության մեծ ներուժ:
Մասնավորապես` հեռանկարային են համարվում տնտեսական, մշակութային ոլորտները: Հարաբերությունների զարգացման հարցում նա կարևորել է նաև հայ համայնքի դերը, որի ներկայացուցիչներն ակտիվ ներգրավված են Սան Պաուլո նահանգի ֆինանսական և տեխնոլոգիական կենտրոններից համարվող Օզասկոյի բոլոր ոլորտներում և պատրաստակամ են աջակցել երկու քույր քաղաքների միջև կապերի խորացմանը:
Ա. Գևորգյանը ողջունել է համագործակցությունը զարգացնելու մտադրությունը` նշելով, որ ավերիչ երկրաշարժից հետո Գյումրին տարեցտարի ոտքի է կանգնում:
