Երեկ, ժամը 12.00-ին ՀՔԾ-ում ՀԱԿ ակտիվիստների և քննչական ծառայության աշխատակցի միջև տեղի ունեցած միջադեպը չի անդրադառնա նախաքննության վրա: «Առաջին լրատվական»-ի հետ զրույցում նման կարծիք հայտնեց ՀԱԿ ակտիվիստների փաստաբան Ստեփան Ոսկանյանը` հավելելով, որ նման դեպք նախկինում չէր եղել: Նա նաև ասաց, որ ՀՔԾ ներկայացել է ուշացումով, այդ պատճառով միջադեպի մանրամասներին ծանոթ է միայն տղաների փոխանցմամբ:
«Ես նույն քննիչի հետ մի շարք քննչական գործողությունների եմ մասնակցել և նրա պահվածքի մեջ երբևէ որևէ անօրեն գործողություն չեմ նկատել. բոլոր գործողություններն անցել են օրենքի սահմաններում, և կարծում եմ այս միջադեպը հետագա նախաքննության վրա չի անդրադառնա»,- նշեց Ս. Ոսկանյանը:
Հիշեցնենք, որ երեկ, ժամը 12-ին քրեական գործով մեղադրյալ Վահագն Գևորգյանը, Դավիթ Քիրամիջյանը և Սահակ Մուրադյանը ներկայացել են ՀՔԾ հարցաքննության նպատակով, սակայն ՀԱԿ ակտիվիստների և քննիչի միջև միջադեպ է տեղի ունեցել: Երեկ ՀԱԿ ակտիվիստները հայտարարել էին, որ իրենց նկատմամբ բռնություն է կիրառվել, իսկ այսօր ՀՔԾ տարածած հաղորդագրության մեջ ասվում է, որ տղաներն իրենց պահել են հանդուգն և ոչ կոռեկտ, որի կապակցությամբ նրանց դիտողություն է արվել:
