Լիբիայի առաջնորդ Մուամար Քադաֆիի սպանությունից հինգ օր անց ԱՄՆ նախագահ Բարաք Օբաման քննադատել է նրան սպանելու մեթոդը և մարմինը ծաղր ու ծանակի ենթարկելը:
Սակայն, ինչպես հետագայում իմացել են ԱՄՆ ԶԼՄ-ները, գնդապետի ոչնչացումը քննարկվել էր Սպիտակ տանը նրա գերեվարությունից մեկ օր առաջ: Ենթադրվում է, որ Վաշինգտոնը փաստացի Լիբիայի նոր իշխանություններին հասկացրել էր, որ նրանց ձեռքերն ազատ են, և կարող են Քադաֆիի հետ վարվել այնպես, ինչպես անհրաժեշտ են համարում:
Հոկտեմբերի 25-ին NBC հեռուսատաընկերության «Երեկոյան շոու» հաղորդման ժամանակ Օբաման կրկնեց այն, ինչ ասել էր Քադաֆիի մահվան լուրը ստանալուց հետո, որ Քադաֆիի սպանությունը այլ բռնապետերի համար դաս կլինի: Սակայն այս անգամ հավելել է, որ ոչ մեկը, թեկուզ նա, ով ամենասարսափելի հանցանքներն է գործել, արժանի չէ նմանատիպ մահվան և ծաղրանքի:
Մինչդեռ New York Times թերթը գրում է, որ մեկ շաբաթ առաջ` հոկտեմբերի 19-ին, Սպիտակ տանը տեղի է ունեցել խորհրդակցությունը, որը տևել է մեկ ու կես ժամ: Խորհրդակցության ժամանակ քննարկվել է Մուամար Քադաֆիի ճակատագիրը գերեվարման դեպքում: Ամերիկացիները լուծումը տեսնում էին գնդապետին դատարանին հանձնելու մեջ, որպեսզի նրա մահը դիտվի որպես տարբերակներից մեկը:
Խնդիրն այն է, որ եթե Քադաֆիին դատեին Լիբիայում, այլ ոչ թե հանձնեին միջազգային դատարանին, ապա լիբիական դատարանը դժվար թե համապատասխաներ միջազգային քրեական իրավունքին:
Սցենարներից մեկով էլ նախատեսվում էր, որ Քադաֆին ապաստան կստանա երրորդ երկրում, օրինակ՝ Չադում կամ Հասարակածային Գվինեայում:
