Թուրքական Dünya Bülteni փոխանցմամբ՝ ԱՄՆ-ն Իրաքից սեփական զորքերի դուրս բերումից առաջ ցանկանում է լուծել այդ երկրում իր ստեղծած հետախուզական ցանցի գործունեության շարունակման հարցը։ Այդ նպատակով ամերիկյան Կենտրոնական հետախուզական վարչության (ԿՀՎ) ներկայացուցիչներն այցելել են թուրքական տարածքում գտնվող Ինջիրլիքի ամերիկյան ռազմաբազա։
Նշվում է, որ 2012 թվականին Իրաքում ամերիկյան զինվորներ չեն լինելու, և որ ԱՄՆ-ը մտահոգված է երկար տարիներ ի վեր այդ երկրում ստեղծված հետախուզական ցանցի նորմալ գործունեության խնդրով։ Այդ նպատակով ԱՄՆ-ի ուշադրությունը բևեռվել է տվյալ տարածաշրջանում իր դաշնակիցների վրա։
Խոսքն առաջին հերթին Թուրքիայի և Քուվեյթի մասին է։ Դա նշանակում է, որ թուրքական տարբերակի ստացվելու դեպքում ԿՀՎ-ն Իրաքին կհետևի Թուրքիայի տարածքից։ Այս մասին բանակցություններն ընթացքի մեջ են։
Հիշեցնենք, որ օրեր առաջ Թուրքիան ու ԱՄՆ-ը կարողացել էին համաձայնության գալ ամերիկյան Predator («Գիշատիչ») անօդաչու հետախուզական ինքնաթիռների շուրջ։ Ըստ դրա՝ Իրաքից ամերիկյան զորքերի դուրս բերումից հետո Predator-ները տեղակայվելու են հենց Ինջիրլիքի ռազմաբազայում և գործածվելու են Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) դեմ (հնարավոր է՝ նաև Թուրքիայի կարևոր խողովակաշարերի պաշտպանության համար)։