Asbarez.com կայքի փոխանցմամբ՝ երեկ Մարդու իրավունքների եվրոպական դատարանը վճռել է, որ Հայոց ցեղասպանության ճանաչումը Թուրքիայում չի կարող հանցագործություն համարվել։
Կլարկի համալսարանի (Մասչուսեթս, ԱՄՆ) Հայոց ցեղասպանության հետազոտությունների կենտրոնի ղեկավար, թուրք պրոֆեսոր Թաներ Աքչամը դատական հայց էր ներկայացրել թուրքական իշխանությունների դեմ, քանի որ նրանք Հայոց ցեղասպանության հարցն արծարծելու համար ճնշումներ են բանեցնում իր նկատմամբ և հալածանքներ կիրառում։
ՄԻԵԴ-ը համաձայնել է Աքչամի հետ, որ թուրքական իշխանությունների պարտադրած օրենքները խախտում են արտահայտության ազատությունը երաշխավորելու վերաբերյալ Թուրքիայի ստանձնած պարտավորությունները։
Հիշեցնենք, որ այս տարվա հունիսին Գլենդելում տեղի ունեցած կոնֆերանսի ժամանակ Աքչամը հայտարարել էր, որ թուրքական իշխանությունները խոշոր գումարներով գնում են իրենց ակադեմիկոսներին Հայոց ցեղասպանության հերքման մասին հրապարակումներ կատարելու համար։
Ավելի վաղ Թաներ Աքչամը հայտարարել էր. «Հայոց ցեղասպանությունն իսկական Ցեղասպանություն է, այլ ոչ թե ջարդ, սպանություն կամ այլ բան: Ես կասեի՝ եթե 1915-ին տեղի ունեցածը Ցեղասպանություն չանվանենք, այդ դեպքում պետք է ասել, որ աշխարհում որևէ ցեղասպանություն չի եղել: Սա է իմ տրամաբանությունը՝ իրերը պետք է կոչվեն իրենց անուններով, որպեսզի կարողանանք ճիշտ վերաբերվել դրանց»։