ՀԱԿ համակարգող Լևոն Զուրաբյանն այսօր լրագրողների հետ հանդիպման ժամանակ ընթերցեց մի հայտարարություն, որտեղ ևս մեկ անգամ հիշատակվում էր իշխող քաղաքական ռեժիմի ապօրինի գործունեությունը և պատրաստակամության բացակայությունը` ՀԱԿ-ի հետ բանակցելով երկրում ժողովրդավարական փոփոխություններ իրականացնելու ուղղությամբ: Զուրաբյանը նկատեց, որ ՀԱԿ-ի գործունեությունն այսուհետ դառնում է ժողովրդի և հասարակության մոբիլիզացիան, քաղաքական լայն ճակատի ստեղծումն՝ ընդդեմ Սերժ Սարգսյանի: Այն կպարտադրի Սերժ Սարգսյանի հրաժարականը: Այդ պայքարի մանրամասներին ու առաջիկա քայլերի ծրագրին ծանոթանալու համար երկրի բախտով հետաքրքրված բոլոր քաղաքացիներին Զուրաբյանը կոչ արեց մասնակցել հոկտեմբերի 28-ի ՀԱԿ հանրահավաքին:
Զուրաբյանը նկատեց, որ իշխող քաղաքական ռեժիմի թուլացմանն ուղղված ցանկացած քայլ ՀԱԿ-ը կատարելու է:
Կոալիցիայի փլուզման հավանականության վերաբերյալ կանխատեսումներ Զուրաբյանը չցանկացավ անել, սակայն նշեց, որ մի բան պարզ է՝ պետական կառավարման ձախողումը և այն մարտահրավերները, որոնք ռեժիմը չի կարողանում իրագործել, առաջացրել է լրջագույն լարվածություն Սերժ Սարգսյանի քաղաքական հենարանում` հենց ռեժիմի ներսում. «Թե այդ պրոցեսներն ինչքան հեռու կգնան, ես դժվարանում եմ որևէ բան ասել»:
ԲՀԿ-ի հետ համագործակցության հնարավորության վերաբերյալ հարցին անդրադառնալով՝ Զուրաբյանը նշեց, որ ցանկացած ուժ, որը հրաժարվում է այս ռեժիմին սատարելուց, սկսում է պայքարել ռեժիմի դեմ, ինքն այդ փաստով դառնում է ժողովրդի դաշնակիցը. «Մենք որևէ ուժի չենք առանձնացնում: Երբ մենք խոսում ենք համագործակցության մասին, մենք չենք ասում՝ միացեք մեզ, այլ բանակցելու ենք միայն այն ուղղությամբ, թե ինչպես կարելի է բանակցել այս ռեժիմի հետ»:
Զուրաբյանը նաև նկատեց, որ այդ համագործակցությունը վերաբերում է, ոչ թե կոնկրետ ինչ-որ թիմի, այլ բոլորին, ովքեր կկանգնեն ժողովրդի կողքին. «Ես կարծում եմ, որ ՀՀԿ-ի բոլոր այն սեգմենտները, որոնք դուրս կգան ռեժիմի դեմ, դա միայն կողջունվի ժողովրդի կողմից»:
Հարցին, թե օլիգարխնե՞րն էլ կարող են դուրս գալ ռեժիմից և միանալ ՀԱԿ-ին, Զուրաբյանը պատասխանեց, որ երբ Հայաստանում տիրի լեգիտիմ իշխանություն, ապա այդ օլիգարխները, բնականաբար, կզրկվեն մենաշնորհից և կհայտնվեն օրենքի դաշտում:
Զուրաբյանը թվելով ՀԱԿ անցած ուղին և պայքարի բոլոր եղանակները,մասնավորապես Ազատության հրապարակի վերանվաճումը, քաղբանտարկյալների ազատ արձակումը, իշխանություններին երկխոսության սեղանի շուրջ նստեցնելը և հաջողված շուրջօրյա հանրահավաքները ասաց, «Եթե այսքանին հասել ենք, Սերժ Սարգսյանի հրաժարականն ի՞նչ է, որ չհասնենք»:
Հարցին թե Սերժ Սարգսյանի հրաժարակնին հասնելու համար կօգտագործվե՞ն արդյոք հերթական ընտրություննները, Զուրաբյանը պատասխանեց. «Եթե բանը հասնի դրան, ապա դա ևս կօգտագործվի»:
