Լոս Անջելեսի դատարանը հոկտեմբերի 24-ին լսել է փոփ արքա Մայքլ Ջեքսոնի նախկին բժշկի` Կոնրադ Մյուրեյի պաշտպանների կողմից առաջ քաշված վկաներին: Այս մասին հայտնում է Agence France-Presse գործակալությունը:
Առաջինններից մեկը ելույթ է ունեցել Ջեքսոնի բժիշկ Ալան Մեցգերը, որը մասնավորապես պատմել է, որ երգիչը գտնվել է մեծ ճշման տակ` կապված Լոնդոնում կայանալիք համերգային շարքի հետ ու տառապել է անքնությամբ:
Բժշկի խոսքով`Ջեքսոնը խնդրել է իրեն տալ ուժեղ քնաբեր, ընդ որում՝ նա ընդգծել է, որ իրեն կարող է օգնել միայն ներերակային ներարկումը:
Մեցգերը, իր իսկ խոսքով, հրաժարվել է երգչին ներարկել, նաև զգուշացրել է դեղամիջոցի չարաշահման վտանգների մասին ու բացատրել, որ նմանատիպ դեղամիջոցներով բուժումը պետք է կատարվի միայն հիվանդանոցային պայմաններում:
Մյուրեյի փաստաբանները փորձում են ապացուցել երդվյալ ատենակալներին, որ Ջեքսոնը կախման մեջ է եղել պրոպոֆոլ հանգստացնող դեղամիջոցից ու այն ներարկել է իրեն անձամբ` անտեսելով բժիշկների նախազգուշացումները:
Մյուրեյի շահերը պաշտպանող փաստաբանները մտադիր են դատարան հրավիրել մինչև 15 վկաների, այդ թվում` բժշկական փորձագետի, ոստիկանի, երգչի մտերիմներին, ինչպես նաև AEG Live ընկերության ղեկավարին` Ռենդի Ֆիլիպսին: Այս ընկերությանն էին պատկանում Ջեքսոնի` Լոնդոնում կայանալիք համերգների բոլոր հեղինակային իրավունքները:
Հիշեցնենք, որ Մայքլ Ջեքսոնը մահացել է 2009 թ. հունիսի 25-ին Լոս Անջելեսում գտնվող իր առանձնատանը 50 տարեկանում:
Նա մահացել է This Is It խորագիրը կրող համերգային նոր ծրագրի մեկնարկից երեք շաբաթ առաջ:
Հետաքննող մարմնի վարկածով` երգչի մահվան պատճառ է դարձել մեծ չափաքանակով պրոպոֆոլի ընդունումը՝ հանգստացնող միջոցների համադրությամբ:
Կոնրադ Մյուրեյը, որը բուժում էր երգչի անքնությունը պրոպոֆոլով, մեղադրվում է նրան ոչ դիտավորյալ կերպով սպանելու մեջ։ Բժշկը չի ընդունում իր մեղքը:
