Վրացական GHN լրատվական գործակալության փոխանցմամբ՝ Ռուսաստանի արտգործնախարար Սերգեյ Լավրովը Голос России, Радио России և Эхо Москвы ռադիոկայանների միջոցով ռադիոլսողների հետ ինտերակտիվ հաղորդակցության ժամանակ անդրադարձել է Առևտրի համաշխարհային կազմակերպությանը (ԱՀԿ) Ռուսաստանի անդամակցության խնդրին, որին տարիներ շարունակ խոչընդոտում է Վրաստանը.
«Այժմ կարող եմ ասել, որ ԱՀԿ նորմերին, կանոններին անմիջականորեն առնչվող բոլոր հարցերը կարգավորված են։ Մոսկվան աջակցում է ԱՀԿ խնդրի կարգավորման վերաբերյալ շվեյցարական կողմի ներկայացրած առաջարկներին։ Մինչդեռ վրացական կողմի դիրքորոշումն ամբողջովին քաղաքականացված է։ Վրացական կողմի ներկայացրած հավակնությունները չեն տեղավորվում ԱՀԿ շրջանակներում»։
Հիշեցնենք, որ Ռուսաստանը փորձում է ԱՀԿ-ին անդամակցել 1993 թվականից, ինչի վրա շարունակ վետո է դնում Վրաստանը։ 2008 թվականի օգոստոսին տեղի ունեցած ռուս-վրացական հնգօրյա պատերազմից հետո առաջին անգամ Ռուսաստանն ու Վրաստանն այս տարվա մարտի 10-ին Շվեյցարիայի Բեռն քաղաքում ԱՀԿ-ին Ռուսաստանի անդամակցության համար նստեցին բանակցությունների սեղանի շուրջ, դրանք, սակայն, ավարտվեցին անարդյունք։
Վրացական կողմը շարունակ առաջ է քաշում աբխազական և հարավօսական հատվածներում մաքսային անցակետերի օրինականացման հարցը։ Մինչդեռ ռուսական կողմն առաջարկում է այդ խնդիրը քննարկել ոչ թե իր, այլ Աբխազիայի և Հարավային Օսիայի հետ։
