Ադրբեջանական ANS PRESS-ի փոխանցմամբ՝ այսօր ՄԱԿ-ի Գլխավոր ասամբլեան ընտրելու է 2012-2013 թվականների համար ՄԱԿ-ի Անվտանգության խորհրդի (ԱԽ) 5 ժամանակավոր անդամներին։
Արևելաեվրոպական երկրներից մեկ մանդատին հավակնում են Հունգարիան, Սլովենիան և Ադրբեջանը։ Վերջինս երբեք չի հանդիսացել ՄԱԿ ԱԽ ժամանակավոր անդամ, մինչդեռ Հունգարիան կրկնակի եղել է ՄԱԿ ԱԽ ժամանակավոր անդամ (1968-1969 և 1992-1993), իսկ Սլովենիան՝ մեկ անգամ (1998-1999)։
Աֆրիկյան և ասիա-խաղաղօվկիանոսյան երկրներից ՄԱԿ ԱԽ ժամանակավոր անդամի 3 մանդատների համար պայքարելու են 5 երկրներ. Ղրղզստանը, Մավրիտանիան, Մարոկկոն, Պակիստանը և Տոգոն։ Ընդ որում, հաստատված պրակտիկայի համաձայն՝ աֆրիկյան երկրներին տրամադրվելու է 2, իսկ ասիական երկրներին՝ 1 մանդատ։
Դա նշանակում է, որ Ղրզստանն ասիական մանդատի համար պայքարելու է Պակիստանի դեմ, որը նախկինում 6 անգամ ընտրվել է ՄԱԿ ԱԽ ժամանակավոր անդամ։ Աֆրիկյան երկու մանդատի համար էլ կպայքարեն Մավրիտանիան, Մարոկկոն և Տոգոն։ Նրանք բոլորն էլ նախկինում ընտրվել են, ընդ որում, Մարոկկոն՝ երկու անգամ։
Այս տարվա դեկտեմբերի 31-ին ՄԱԿ ԱԽ ժամանակավոր անդամի մանդատին հրաժեշտ են տալու Բոսնիա-Հերցեգովինան, Բրազիլիան, Գաբոնը, Լիբանանն ու Նիգերիան։
Հիշեցնենք, որ ՄԱԿ-ի ԱԽ-ը բաղկացած է 15 անդամներից, որոնցից 5-ը (ԱՄՆ, Ռուսաստան, Չինաստան, Մեծ Բրիտանիա, Ֆրանսիա) մշտական անդամներ են, իսկ 10-ը՝ ժամանակավոր անդամներ։ Վերջիններս ընտրվում են երկու տարի ժամկետով, ամեն տարի տեղի է ունենում դրանցից 5-ի փոփոխությունը։
