Ամերիկայում մարդիկ մամոնտների որս էին անում դեռևս 13,800 տարի առաջ՝ մոտ 800 տարի ավելի շուտ, քան մինչ այս ենթադրում էին գիտնականները: Այսպիսի եզրակացության է հանգել Տեխասի A&M համալսարանի հնագետ Մայքլ Ուոթերսը: Նրա հետազոտության արդյունքները տպագրվել են NewScientist գիտական ամսագրի նոր համարում:
Ինչպես տեղեկացնում է ИТАР-ТАСС-ը, գիտնականը, տարիքը որոշելու համար օգտագործելով նորագույն սարքավորումների և ռադիոածխածնային մեթոդը, ևս մեկ անգամ վերլուծության է ենթարկել 1977 թվականին Կառլ Գուստաֆսոնի կողմից պեղված մամոնտի կմախքը:
Մամոնտի կողերից մեկի վրա հայտնաբերվել է ոսկորի ևս մեկ կտոր, որը ակնհայտորեն մարդու ձեռքով սրված է: Գուստաֆսոնը ենթադրել է, որ դա նիզակի ծայրակալ է:
Հնագետը պարզել է, որ մամոնտը մոտավորապես 14 հազար տարեկան է: Ստացվում է այնպես, որ ինչ-որ մեկն այդ տարածքում մամոնտներ է որսացել «Կլովիսի քաղաքակրթության» ներկայացուցիչներից մոտ 1000 տարի ավելի շուտ:
Հյուսիսային Ամերիկայում «Կլովիսի քաղաքակրության» ներկայացուցիչները ապրել են շուրջ 13 հազար տարի առաջ:
